Ötən ay New-York Times mənbəsi Samsung şirkətinin Galaxy smartfon və plaşetlərində Microsoft Bing axtarış sisteminə keçid edəcəyi iddia edilmişdi. Lakin indi məlum olub ki, texnologiya nəhəngi Google axtarış sistemi ilə davam etməyi seçərək Microsoft şirkətinin Bing axtarış sistemindən imtina edib. Xatırladaq ki, Microsoft şirkəti Bing axtarış siteminə bir çox yeniliklər gətirmişdi. Bunlardan biri də məhz süni intellekt əsaslı axtarış idi. Məhz bu yeniliklərdən sonra Samsung Galaxy modellərində axtarış sistemini dəyişməyi düşünmüşdü. Qeyd edək ki, Microsoft təqdim etdiyi yeniliklərdən sonra Bing axtarış sistemi ilə bağlı bir çox texnologiya nəhəngləri ilə danışıqlar aparırdı.
Microsoft şirkəti ötən günlərdə Mozilla şirkəti ilə Bing axtarış sistemi ilə bağlı razılığa gəlmişdi. Belə ki, Bing axtarış sistemi Firefoxda standart axtarış sistemi olacaq. Qeyd edək ki, daha əvvəl Firefoxda standart axtarış sistemi Google idi. Lakin smartfon istifadəçilərini də axtarış sisteminə cəlb etmək istəyən şirkət Samsung ilə razılıq əldə edə bilməyib. Görünən odur ki, Samsung şirkəti Microsoft Bing əvəzinə Google axtarış sistemi ilə yoluna davam edəcək. İnsayderlər iddia edir ki, texnologiya nəhəngi ChatGPT süni intellekt alətinin rəqibi olan Google Bard süni intellekt alətinə etibar edir.
Samsung şirkəti Microsoft şirkətinə Bing axtarış sistemi ilə bağlı müsbət rəy verməsə də bəzi məqamlarda razılıq əldə edilib. Belə ki, Microsoft şirkəti Galaxy cihazları üçün təqdim etdiyi SwiftKey yenilənməsi ilə Bing axtarış sisteminin süni intellekt imkanlarını təklif edəcək. Razılaşma nəticəsində artıq SwiftKey bütün Galaxy modellərində yüklənmiş olaraq gələcək.
