TikTok şirkəti artıq viral effekt hazırlayan istifadəçilər üçün 6 milyon dollarlıq büdcə ilə pul verərək onları mükafatlandıracaq. Bildiyimiz kimi, TikTok sosial şəbəkələr arasında ən gəlirlisi hesab olunurdu. Şirkətin elan etdiyi yenilik bu iddanı bir daha sübut edir. Şirkət milyonlarla istifadəçi tərəfindən istifadə edilən viral effekt hazırlayanlara pul mükafatı verəcək. TikTok Effect Creator adlanan proqramda ən viral effektləri hazırlayanlar demək olar ki, varlanacaq. Şirkət effekt yaradıcılarına mükafat vermək üçün 6 milyon dollarlıq büdcə hazırladığını elan edib. Beləliklə tətbiqdə pul qazanmağın bir neçə yolu olacaq.
Ümumiyyətlə TikTok platformasında kontent yaradıcıları əsasən canlı yayımlarda qazandıqları hədiyyə coinlər hesabına gəlir əldə edirdi. İndi isə TikTok viral effekt hazırlayanlar üçün pul verəcək. Yeni proqrama əsasən istifadəçi tərəfindən yaradılan effekt 90 gün ərzində 500 min müxtəlif videoda istifadə edilərsə TikTok 700 dollar mükafat ödəyəcək. 500 min limitindən sonra isə şirkət istifadəçiyə hər 100 min videoya görə 140 dollar əlavə mükafat verəcək. Qısa olaraq desək sizin yaratdığınız effekt tətbiqdə 1 milyon videoda istifadə edilərsə TikTok sizə 1400 dollar mükafat verəcək. Lakin şirkət videoların müxtəlif hesablarda paylaşılması şərti ilə videoların 500 min ədəd olmasını tələb edir.
Qeyd edək ki, bu ilin əvvəlində viral olan Bold Glamour effekti 58.6 milyon videoda istifadə edilmişdi. Bu isə onu göstərir ki, tətbiqdə viral effekt hazırlamaqla varlanmaq mümkündür. Lakin hələlik TikTok şirkəti sadəcə ABŞ, Fransa, Almaniya, İtaliya, İspaniya və Böyük Britaniyada viral effekt hazırlayanlara pul mükafatı verəcək. Yeni xüsusiyyətin ölkəmizə və başqa ölkələrə gəlib-gəlməyəcəyi hələlik bilinmir.
