Uzun müddətdir gözlənilən ilin texnologiya tədbiri adlandıra biləcəyimiz Google I/O 2023 tədbiri baş tutdu. Texnologiya nəhənginin yeni modellərini və funksiyalarını təqdim etdiyi tədbir şirkətin baş icraçı direktoru olan Sundra Pichai-nin çıxışı ilə başlayıb. O çıxışı zamanı qeyd edib ki, “Süni intellektə əsaslanan şirkət kimi 7 illik macəramızdan sonra biz həyəcanverici bir dönüş nöqtəsindəyik“. Bununla da Pichai yeni süni intellekt əsaslı proqramların, funksiyaların olacağını əvvəldən xəbər verib. İlk öncə onu qeyd edək ki, tədbirdə uzun müddətdir haqqında iddialar irəli sürülən Google Pixel Fold və Pixel 7A smartfonları nəhayət ki, təqdim edilib. Bu smartfonlar barədə məlumat almaq üçün saytımızdakı digər xəbərə keçid edə bilərsiniz. İndi isə gəlin texnologiya nəhənginin təqdim etdiyi yeniliklərə nəzər salaq.
Google I/O 2023 tədbirində hansı yeni funksiyalar təqdim edildi?
Tədbirdə xəbər verilən ilk yenilik məhz Gmail ilə bağlı idi. Belə ki, Gmail tətbiqinə “Help me write” süni intellekt funksiyası əlavə edilir. Belə ki, bu funksiya vasitəsi ilə bir klik ilə istədiyiniz e-poçt məktununu süni intellekt vasitəsi ilə yarada və göndərə bilərsiz. Google bildirir ki, əgər sizin uçuşunuz ləğv edilibsə və bununla bağlı e-poçt almısınızsa, sadəcə bir klik ilə siz pulunuzn iadə edilməsi ilə bağlı məktub yarada bilərsiniz. Əslində bu funksiya 2017-ci ildə təqdim edilən Smart Reply və Smart Compose funksiyalarının daha təkmilləşdirilmiş versiyasıdır.
Texnologiya tədbirinin davamında yeni İmmersiv Görünüşlü Google Maps təqdim edildi. Google demək olar hər I/O tədbirində Google Maps tətbiqini təkmilləşdirdiyini elan edir və yenilikləri göstərir. Bu dəfə isə Google I/O 2023 tədbirində süni intellekt vasitəsi ilə xəritəni immersiv şəkildə istifadəçilərə təklif edən yeniliyini təqdim edib. Gələcəkdə 15 şəhərdə əlçatan olacaq yeni funksiya havadan və yerdən çəkilən şəkilləri birləşdirərək 3D görüntü yaratmağa çalışır. Bununla da istifadəçilər öz marşrutları boyunca bütün maneələri, məlumatları daha rahat formada əldə edəcək. Hələlik isə bu funksiya Nyu-York şəhərində istifadə olunacaq.
Google I/O 2023 tədbirində ən çox diqqət cəlb edən yeniliklərdən biri məhz yeni Magic Editor funksiyasıdır. Süni intellektə əsaslanan bu funksiya ilə istifadəçilər Google Photosda olan şəkillərini istədikləri kimi dəyişə biləcəklər. Burada istifadəçilər istənilən obyekt və ya subyektin yerini dəyişə bilər, arxa planda fərqlilik edə bilər. Qeyd edək ki, yeni Magic Editor funksiyasının bu ilin sonuna qədər istifadəyə verilməsi gözlənilir.
Nəhayət tədbirdə təqdim edilən yeniliklərdən biri də PaLM 2 tətbiqidir. Google bildirir ki, PaLM2 fundamental tədqiqatlara və ən son infrastruktura əsaslanır. PaLm 2 tətbiqində riyazi və elmi mövzuları daha rahat və daha tez həll etmək mümkündür. Yeni tətbiq həmçinin Bardın infrastrukturunu da təşkil edir. Yeni tətbiq 20-dən çox proqram dilini dəstəkləyir və 100-dən çox dildə işləyə bilir.
Google Android ekosistemi üçün yeniliklər təqdim edib
Süni intellekt texnologiyaları ilə işləyən yeni funksiyalarından əlavə Google I/O 2023 tədbirində Android tərəfində olan yeniliklərindən də danışıb. Android ekosistemi üçün təqdim edilən yeniliklərdən ən birinci böyük ekranlı cihazlarda olub. Belə ki, texnologiya nəhəngi Gmail, Photo, Meet daxil olmaqla 50-dən çox tətbiqi böyük ekranlı cihazlar üçün optimallaşdırıb. Bu yenilik həmçinin yeni Pixel Fold üçün də keçərlidir. Google ağıllı saat modellərini də unutmayıb. Texnologiya nəhəngi Wear OS 4 ilə ağıllı saatlarda daha çox batareya ömrü təklif edəcək. Həmçinin köhnə ağıllı saat modellərinindən btün məlumatları yenilərinə ötürmək də mümkün olacaq. Bundan əlavə ağıllı saatlar Gmail Təqvim, Spotify, WhatsApp kimi üçüncü tərəf proqramları da qəbul edəcək.
Texnologiya nəhəngi bildirib ki, hər bir avtomobil istehsalçısı tərəfindən dəstəklənən Android Auto bu il 200 milyon avtomobil üçün təklif olunacaq. Google-da quraşdırılmış avtomobil modellərinin sayı ilin sonuna qədər iki dəfədən çox artacaq. Bundan əlavə Google cihazların birlikdə daha yaxşı işləməsinə kömək etmək üçün yeni xüsusiyyətlər təklif edəcək. Bunlar Fast Pair, Google Cast və Nearby Share xüsusiyyətləridir. Artıq Android TV əməliyyat sistemindəki interfeysdə yenilənəcək.
iPhone modellərində olan iPhone-mu tap tətbiqinə oxşar olan Cihazımı Tap proqramı müxtəlif markaların qulaqlıqları və planşetlərini də dəstəkləyərək genişlənəcək. Süni intellekt dəstəkli divar kağızları da təqdim edilib. Belə ki, süni intellektlə işləyən Magic Compose , Cinematic Wallpaper və Generative AI Wallpaper kimi funksiyalar əlavə edilib. Magic Compose Gmail-də olduğu kimi daha sürətli mesajlaşmağa kömək edəcək.
Google şirkəti sadaladığımız yenilikləri I/O 2023 tədbirində təqdim etdikdən sonra, yeni cihazlarını elan etdi. Hər il bizləri təəccübləndirməyi bacaran Google şirkəti bu dəfə gözləniləndən daha çox yenilik təqdim etdi. Ümumiyyətlə insayderlə Google şirkətinin möhtəşəm yeniliklər ilə tədbirdə çıxış edəcəyini bildirmişdi. Lakin bu qədər yenilik demək olar ki, bir ilkdir.
Google axtarış sistemi də başdan tərtib olunur
Bilirik ki, önümüzdəki dövrdə SEO üçün xüsusi hazırlanmış məzmundan çox real insanların real təcrübələrini ön plana çıxaracaq. Belə ki, axtarış sisteminin yeni görünüşü də bunu bizlərə nümayiş etdirib. Yeni dövrü yeni nəslin gözləntiləri və istifadə vərdişləri istiqamətində formalaşdırmaq istəyən internet nəhəngi yaxın gələcəkdə axtarış nəticələrinə daha qısa videolar əlavə edəcək və qısa cavablara diqqət yetirəcək. SEO əsaslı saytlara istinad edən axtarışlar əvəzinə AI Snapshot imkanı ilə SGE adlandırılmış (Search Generative Experience) adlı infrastruktur bizlərə daha geniş və innovativ cavablar təklif edəcəkdir.
