Realme şirkəti ötən gün Realme 11 seriyası cihazlarını təqdim etdi. Çində keçirilən təqdimat tədbiri zamanı bizlərin qarşısına rəqabətcil qiyməti ilə fərqlənən və bir o qədər də maraqlı texniki xüsusiyyətlərə sahib cihazlar çıxdı. Belə ki, seriya daxilində ənənəvi 3 cihaz bizi gözləyir. Bu cihazlara Realme 11 Pro+, Realme 11 Pro və Realme 11 modelləri daxildir. Realme 11 modelini kənara qoysaq, Realme 11 Pro və Realme 11 Pro+ modelləri eyni dizayn konseptini özlərində birləşdirirlər. Cihazların üzərindəki dizayn komponentləri italyan dizayner olan “Gucci” və “Bulgari” ilə işləmiş Matteo Menotto tərəfindən tərtib olunub. Ona görə smartfonlar olduqca estetik görünşə malikdirlər.
Realme 11 Pro xətti bizə nə vəd edir?
Realme 11 seriyası daxilindən Realme 11 Pro və Realme 11 Pro+ modellərinin hər ikisi öz gücünü Dimensity 7050 çipsetindən alır. Performans baxımından Dimensity 7050 çipsetinin Dimensity 1080 çipsetindən heç bir fərqi yoxdur. Təkrar brendləşdirilmiş versiyasıdır və sadəcə adı dəyişərək bəzi kiçik yeniləmələr alıb. Hər iki cihaz 6.7 düymlük FHD+ AMOLED ekran paneli ilə təchiz edilib. Olduqca yüksək keyfiyyətli ekran panellərinin görüntü yeniləmə tezliyi 120Hz, sensor tezliyi 360Hz, PWM aşağı tezlikli titrəməsi isə 2160Hz səviyyəsindədir. 10 bitlik yüksək rəng dərinliyinə malik ekran 93,65%-lik bir ekranın gövdə nisbəti təklif edir.
Cihazlar arasındakı əsas fərqliliklər özünü kamera sensoru tərəfində göstərir. Realme 11 Pro+ modeli 1/1.4 düymlük 200MP ISOCELL HP3 kamera sensorundan əsas kamerada istifadə edir. Realme 11 Pro modelində isə 1/1.67 108MP ISOCELL HM6 kamera sensorunun xüsusiləşdirilmiş variantı kimi 100MP S5KHM6 sensoru istifadə olunub. Hər iki cihazda OIS dəstəyi mövcuddur. Lakin gülünc olan bir nüans var ki, 8MP ultra-geniş bucaqlı kamera yalnız Realme 11 Pro+ modelində mövcuddur. Hər iki cihaz isə özlüyündə 2MP makro sensoru ilə gəlir. Realme 11 Pro+ modeli 32MP, Realme 11 Pro modeli isə 16MP selfi kameraları ilə təchiz edilib.
Hər iki cihaz 5000 mAs həcmində batareyaya sahibdir, lakin şarj sürəti baxımından dəyişikliklər var. Ən güclü model 100 vatt sürətl şarj dəstəkləyərkən digər model sadəcə 67 vatt ilə kifayətlənir.
Sadə Realme 11 nə təklif edir?
Seriyanın ən zəif bəndi isə ənənəvi ucuz Realme dizaynına malikdir. 6.43 düymlük FHD+ 90Hz Super AMOLED ekranla qarşımıza çıxır. Öz gücünü isə Dimensity 6020 çipsetindən alır. Bu çipset isə Dimensity 810 ilə ekvivalentdir. 64MP OV64B40 əsas, 2MP makro sensorları ilə gücləndirilir. Ön tərəfdə isə bizləri 8MP selfi kamerası gözləyir. 5000 mAs batareyaya malik olub, 33 vatt şarj dəstəyi ilə qarşımıza çıxır.
Smartfonların qiyməti
Realme 11 seriyasının qlobal bazarda əlçatanlığı barədə heç bir məlumat yoxdur. Lakin Realme 11 modeli Çində 230$, Realme 11 Pro modeli 245$, Realme 11 Pro+ modeli isə 290$ başlanğıc qiyməti ilə diqqət çəkir. Qlobal bazar təqdimatı yay aylarına planlaşdırılır.
