Microsoft şirkəti, texnologiya sahəsində innovativ yenilik hesab edilən Windows 10 əməliyyat sistemi üçün yeniləmə dəstəyini dayandıracaq. Belə ki, Widows 10 son olaraq 22H2 yeniləməsini aldıqdan sonra artıq pensiyaya ayrılacaq. Bildiyimiz kimi, bu əməliyyat sistemi Windows 7 və Windows 8 əməliyyat sistemlərindən sonra texnologiya sahəsində böyük yenilik kimi qələmə verilmişdi. Windows 10 sisteminin sələflərindən ən böyük fərqi yeni interfeysi və performansı idi. Lakin Microsoft Windows 10 əməliyyat sisteminə dəstəyini 14 oktyabr 2025-ci ildə dayandırcaq. Əslində bu qərar Windows 11 əməliyyat sisteminə də təsir edə bilər.
Ümumiyyətlə son dövrlərdə Microsoft şirkətinin əsas strategiyası yeni təqdim edilən Windows 11 əməliyyat sisteminin reklamı idi. Belə ki, şirkət Windows 10 istifadəçilərinə belə pulsuz olaraq yeni əməliyyat sisteminə keçid imkanı verir. Lakin istifadəçilərin əksəriyyəti heç bir səbəb olmadan artıq öyrəşdikləri əməliyyat sistemini dəyişmək istəmir. Məhz bu səbəbdən də şirkət yeni strategiyaya uyğun olaraq Windows 10 əməliyyat sistemi üçün yeniləmə dəstəyini dayandırır. Windows 11 əməliyyat sistemi istifadəyə verildiyi gündən bəri problemləri saysız-hesabsız artırdı. Belə ki, həm oyun performansı, həm də kompüterin performansı aşağı düşürdü. Microsoft bu problemləri tədricən aradan qaldırsa da, artıq Windows 10 istifadəçiləri Windows 11 əməliyyat sisteminə keçidin düzgün seçim olmadığına inanmışdır.
Microsoft şirkətinin Windows 10 sistemi üçün yeniləmə dəstəyini dayandırması qərarı tədricən istifadəçiləri Windows 11 sisteminə keçirəcək. Buna səbəb isə artıq Windows 10 sisteminin performansı olacaq. Belə ki, yeniləmə dəstəyi olmayan əməliyyat sistemləri tədricən brauzerlərdə belə problemlər ilə üzləşir. Həmçinin bu əməliyyat sistemləri təhlükəli ola bilər.
