Amerika bazarında liderlik edən Ford Motor şirkəti, Avropa bazarı üçün yeni nəsil Ford Explorer elektromobilini təqdim edib. İllər əvvəl əzəmətli SUV modelləri ilə tanınan Explorer xətti, bu gün aqressivliyini nisbətən itirmiş tamamilə yenilənmiş kuzovu ilə diqqət çəkir. Müasir dövrümüzə qədər 6 dəfə yenilənən seriyaya bu dəfə tamamilə futuristik üsluba və elektrik mühərriklərinə sahib elektromobil əlavə edilib. Volkswagen ID.4 elektromobilinə oxşarlığı ilə diqqət çəkən yeni Explorer, elə məhz alman brendi ilə rəqabətə girəcək. Əslində, elə bu elektromobil bir növ Volkswagen ruhuna da sahibdir ki, istehsal edilən platforma VW MEB arxitekturasıdır.
Yeni Ford Explorer elektrikli SUV modeli demək olar Volkswagen ID.4 modeli ilə eyni ölçüyə malikdir. Lakin vurğulamaq lazımdır ki, yeni elektromobil ID.4 modelindən nisbətən daha kompaktdır. Təsəvvür edin bundan əvvəl Explorer tam olaraq 5 metr uzunluğa sahib idi. 7 yerlik nəhəng Ford Explorer isə hal-hazırda yarım metr daha qısadır. Lakin bu gün yeni Explorer modeli 7 yerlik bir imkandan tamamilə məhrum qalır.
VW MEB arxitekturası ilə daha kompakt dizayn edilən eksteryerdə, bizi ilk olaraq klassik Ford loqosu və Explorer yazısı qarşılayır. Həmçinin sələfindən fərqli olaraq elektromobil radiator barmaqlığına malik deyil. Açıq-Mavi rəngdə olan elektromobil futuristik təkər disklərinə və kənar xətlərə malikdir. LED fənərlər ilə təchiz edilən model klassik explorer dizaynından tamamilə uzaqlaşır. İnteryerdə isə bizi 14.6 düymlük nəhəng cihazlar paneli qarşılayır. Mərkəzdəki ekran müxtəlif bucaqlar altında üfüqə nəzərən yerini dəyişə bilir. Bundan əlavə sürət və digər funksiyaları sürücüyə göstərən 5 düymlük panel də mövcuddur. Masaj, soyutma və isitmə kimi funksiyalara sahib olan oturacaqlar dəri üzlüyə malikdir. Ümumi interyer konsepti daha əvvəl çıxmış Ford Mustang Mach-E ilə oxşardır.
Ford Motor tərəfindən bu elektromobil ADAS paketi ilə tam şəkilli təchiz edildiyindən avtonom sürüş qabiliyyətləri baxımından yaxşı səviyyədədir. 12 ultrasəs sensoru, 5 kamera və 3 radardan ibarət sistem avtomobilin ətraf mühitlə əlaqəsini təmin etməkdədir.
Yeni elektromobil 2 versiyada təqdim edilir ki, Ford Explorer və Explorer Premium olmaqla əldə edə bilərsiniz. Sadə Explorer 170 at gücü hasil edən elektrik mühərrikinə sahib olduğu halda, Explorer Premium modeli 286 at gücü hasil edir. Müvafiq olaraq isə elektromobillər 52 kVts və 77 kVts batareya tutumuna malikdirlər. Həmçinin sadə versiya 350 km, daha uzun mənzilli versiya isə 540 km yürüyüş məsafəsi vədd edir. Yeni Ford Explorer modelinin başlanğıc qiyməti 45 min avro təyin olunub.
