Ötən gün Galaxy S23 Ultra modeli ay rejimində görüntüləri “saxtakarlıqla” çəkir başlığı ilə gündəmə gəldi. Buna səbəb bir “Reddit” istifadəçisinin apardığı sınaqlar idi. Belə ki, ay rejimini sınaqdan keçirmək üçün bu Galaxy S23 Ultra istifadəçisi ilk növbədə yüksək keyfiyyətli bir ay görüntüsünü yükləyir. Daha sonra görüntünün keyfiyyətini azaltmaq üçün 170×170 piksel təsvir ölçüsünüə qədər kiçildir. Üstəlik daha da detal səviyyəsini pisləşdirmək üçün görüntüyə bulanıqlıq əlavə edir. Proses isə bundan sonra başlayır. Monitorda aşağıda gördüyünüz bulanıq görüntünü açan “Reddit” istifadəçisi Galaxy S23 Ultra olduğu deyilən smartfonla korlanmış ay şəklini çəkdikdə reallıqda olmayan qədər detallı görüntü qarşımıza çıxarır.
Samsung şirkəti ay rejimi ilə istifadəçilərini aldadır?
Əslində bu qədər böyük müzakirənin yaranmasına səbəb süni intellektin necə işlədiyini çoxlarının doğru anlamamasıdır. Bir çoxları çəkdikləri görüntünün mükəmməl olmasını kameranın texniki cəhətdən güclü olmasından qaynaqlandığını düşünür. Lakin görüntünün keyfiyyətli olmasında proqram təminatının rolu çox böyükdür. Samsung Galaxy seriyası üçün ay rejimində də əsas işi süni intellekt və ya proqram təminatı görür.
Aparılan bu test Samsung şirkətinin istifadəçilərini aldadır deməyə əsas vermir, çünki şirkət yazılı məqalədə ay rejiminin necə işlədiyini ötən il rəsmi olaraq açıqlamışdı. Kamera ay görüntüsünün yaradılmasında düşündüyünüz qədər böyük rol oynamır. Sadəcə proqram təminatına işıqla bağlı lazımi “dataları” ötürür. Yəni ay üzərindəki kraterlər məhz işıq hesabına sensora daxil olan məlumatlarla işlənir. Bu datalar isə keyfiyyətli görüntü üçün kifayət etmir. Burada isə süni intellekt işə düşür və datalara görə ayı “zənginləşdirərərək” qarşımıza “süni” bir ay fotosu çıxarır. Bəziləri bunun real olduğunu zənn edir, lakin əslində böyük bir hissəsi proqramla yaradılmış bir görüntüyə baxırsınız.
“Reddit” istifadəçisinin milyonlarla insan tərəfindən diqqət çəkən testi də bunun üçün mükəmməl bir nümunədir. Galaxy modeli qaranlıq otaqdakı monitorda olan bulanıq ay görüntüsünü real ay zənn etdiyindən fotoda olan dataları (qaranlıq və işıqlı bölgələri) analiz edib ona uyğun bir süni ay görüntüsü hazırlayır. Eyni şey arxası blurlu şəkillərinizdən tutmuş, periskopik yaxınlaşdırma zamanı yüksək keyfiyyətli kəskin görüntülərin yaradılmasında da keçərlidir.
