Honor Magic 5 seriyası və Magic Vs təqdim olunub!

Honor şirkəti biraz əvvəl keçirdiyi təqdimat tədbirində Honor Magic 5 seriyası başda olmaqla, Honor Magic Vs seriyasını rəsmi olaraq anons etdi. Çox qəribədir ki, Honor seriyası daxilində cihazlar yeni model dizayn baxımından yenilənsə də konsept olaraq bu cihazlar Honor olduqlarını necəsə hiss etdirə bilirlər. Nəticə etibarilə biraz əvvəl Honor Magic 5, Honor Magic 5 Pro, Honor Magic 5 Lite və Honor Magic Vs modelləri qarşımıza çıxarıldı. Bu cihazlar arasından Honor Magic 5 Lite və Honor Magic Vs, əslində bizə çoxdan tanışdır. Honor Magic 5 Lite modeli bu gün ölkəmizdə satışda olan Honor X9a modelinin təkrar brendləşdirilmiş variantıdır. Saytımızda həmin cihaz barəsində olan “Honor X9a 5G modeli rəsmi olaraq Azərbaycan bazarında!” məqaləsinə keçid etməklə cihazla ətraflı tanış ola bilərsiniz. Honor Magic Vs modeli isə ötən ilin noyabr ayında təqdim edilmişdi. Gəlin mövzunu çox uzatmadan cihazlara yaxından nəzər salaq.

Honor Magic 5 seriyası ilk olaraq arxa tərəfin dizaynı və kamera cəhətdən nə vəd edir?

Honor Magic 5 Pro modelinə baxdıqda Honor Magic 4 Pro ilə müqayisədə dizayn baxımından insanı yanıldan bir hissiyata qapıla bilərsiniz. Çünki, kamerası daxilində Magic 4 Pro modelində 4 fərqli kamera modulu görünərkən, Magic 5 Pro modelində 3 fərqli kamera görünür. Lakin əslində Magic 4 Pro modelində dördüncü arxa kamera yoxdur. Şirkət kameralardan birinin yerinə ToF sensorunu quraşdırmaqla elə görünüş əldə etmişdi. Magic 5 Pro modelində isə belə bir dizayndan istifadə edilmir. ToF sensor kənar bir hissədə dayanıb, kamera modullarında isə həqiqi sensorlar quraşdırılıb.

Bənzər dizayn fəlsəfəsi Honor Magic 5 seriyası daxilində Magic 5 modelində də işlədilir. Lakin kamera modulunun daha sadə olduğunu müşahidə etmək mümkündür ki, bu hal texniki cəhətdən də keçərlidir.

Kameradan danışmışkən gəlin sizlərə cihazların kameraları barədə məlumat verək. Honor Magic 5 Pro modelində 1/1.12 düymlük 50MP təsvir ölçülü kamera sensoru işlədilib. Sensor barədə detallar verilməsə də aldığımız məlumata görə bu sensor Honor Magic 4 Ultimate modelindəki əsas kamera ilə birə-bir eynidir. Periskopik telefoto kameramız isə 3.5 qat optik yaxınlaşdırma edə bilən 50MP təsvir ölçülü IMX858 sensoru ilə gücləndirilib. Son kameramız isə 50MP təsvir ölçülü 122° ultra-geniş bucaqlı kameradır. Ultra-geniş bucaqlı kamera istisna olmaqla kameralar OIS ilə gücləndirilib.

Smartfon 3D ToF lazer, rəng temperaturunu ölçmək üçün spektrum sensoru, hətta titrəmələri ölçmək üçün xüsusi sensorla da təchiz edilib. Cihazla HDR10+ formatında Magic-Log 10 bitlik 4K keyfiyyətli 60FPS videolar qeydə almaq mümkündür. Honor şirkəti IMAX Enhanced Movie Master texnologiyası ilə istifadəçilərin telefonlar ilə video çəkməsinə və birbaşa redaktə etməsinə imkan verən özəlliklər də gətirir. Ön tərəfdəki kapsul daxilində isə 12MP selfi kamerası və 3D üz skaneri mövcuddur. Hansı ki, təhlükəsizlik üçün barmaq izi sensorundan əlavə işlədilə bilər.

Honor Magic 5 modelində isə OIS dəstəyi olmayan əsas kamera 1/1.49 düymlük 54MP sensorla əvəzlənib. 50MP ultra-geniş bucaqlı, 32MP telefoto kameraları quraşdırılıb. Selfi kameramız isə 12MP təşkil edir. Honor Magic 5 seriyası barədə kamera detalları haqqında danışmaq, fikrimizcə kifayətdir.

Honor Magic 5 seriyası ekran cəhətdən nə qədər iddialıdır?

Seriya daxilində Honor Magic 5 Pro modelinin ekranı son dərəcə iddialıdır. 6.81 düymlük ekran dörd tərəfdən qıvrımlara malikdir. LTPO tipi AMOLED ekran paneli 120Hz görüntü yeniləmə tezliyini dəstəkləyir. 1312 x 2848 təsvir ölçülü bu ekran tam olaraq 1800 nit paraqlığa malikdir. AMOLED ekran panellərində keyfiyyətə son dərəcə önəm verən Honor, bu modelində 2160Hz tezlikli PWM texnologiyasını istifadəçilər üçün təmin edir. IMAX Enhanced sertifikatlı bu ekran həm 120 nit parlaqlıqda gecə istifadəsi, həm normal vəziyyətdə 800 nitlik istifadə üçün ayrıca kalibrasiya edilib. Hətta xüsusi ekran texnologiyasını istifadəyə verdiyini deyən Honor melatonin konsentrasiyasını 20%-ə qədər yaxşılaşdıraraq yuxu səviyyəsini belə ekrana baxdıqda azaltmadığını qeyd edir. Təbii ki, doğruluğu sual altında olan bir detaldır.

Honor Magic 5 isə biraz daha kiçik 6.73 düymlük OLED krana malikdir. Maksimum parlaqlığı 1600 nit ilə ölçülən ekran 120Hz görüntü yeniləmə tezliyi vəd edir. Texniki baxımdan Honor Magic 5 seriyasının Pro nümayəndəsinə yaxın olsa belə, biraz daha ucuz olması üçün kəskin qıvrımlar ləğv edilib. Daha çox danışılacaq detal isə, fikrimizcə yoxdur. Selfi kamersının mərkəzdə olduğu şəkillərdən hər birimiziə aydındır.

Cihazların performans, batareya və digər detalları hansı səviyyədədir?

Hər iki cihaz öz gücünü Snapdragon 8 Gen 2 çipsetindən alır. Yaddaş və operativ yaddaşın tipi haqqında sayt rəsmi açıqlama vermir. Lakin Honor Magic 5 Pro batareya texnologiyası baxımından ayrıca diqqət çəkir. Çünki, cihaza sektorda ilk dəfə silikon-karbon tərkibli batareya quraşdırılıb. Silikon-karbon batareya, litium tərkibli batareya ilə eyni ölçüdə 5450 mAs “həcmə” malikdir və təqribi 12,8% daha yüksək enerji sıxlığı gətirir. Yəni təqribən eyni həcmdə 12,8% daha yüksək enerji effektivliyinə sahibdir. 66 vatt naqilli, 50 vatt naqilsiz SuperCharge texnologiyasını dəstəkləyir.

Honor Magic 5 isə anladığımız qədərilə standart 5100 mAs həcmli batareyaya və 66 vatt naqilli şarj dəstəyinə sahibdir. Gəlin Honor Magic 5 seriyası barədə detalları burada sonlandırıb, Honor Magic Vs barədə qısaca danışaq və həmçinin qiymətlərə nəzər salaq.

Honor Magic Vs qatlana bilən smartfonu nə vəd edir?

Honor Magic Vs dünyanın ən ideal şaquli qatlanan smartfonları arasındadır. Smartfon Galaxy Z Fold 4 modelindən fərqli olaraq daha yaxşı ekran gövdə nisbətli xarici ekrana, daha nazik və yüngül dizayna sahibdir. O cümlədən ekran qatlandığı təqdirdə aradakı boşluq xüsusi qatlama mexanizmi sayəsində çox kiçik qalır.

Smartfon öz gücünü Snapdragon 8+ Gen 1 çipsetindən alır. 7.9 düymlük nəhəng qatlana bilən OLED ekranı 90Hz görüntü yeniləmə tezliyinə malikdir. Xaricdəki ekran isə normal smartfonlar kimi 6.45 düym OLED panellə təchiz edilib və 2560×1080 piksel təsvir ölçülü bu ekran 120Hz görüntü yeniləmə tezliyinə malikdir. Qatlanan ekranın mexanizmi 400.000 dəfədən çox açılıb-bağlanmağa davamlıdır.

Arxa tərəfdə 54MP IMX800 əsas, 3 qat optik yaxınlaşdıra bilən 8MP telefoto və 50MP ultra-geniş bucaqlı kamera sensorları işlədilib. Ekran daxilindəki selfi kamerası isə 16MP təsvir ölçüsünə sahibdir. 5000 mAs batareyası 66 vatt sürətli şarj dəstəkləyir.