Bildiyimiz kimi, bir neçə həftə əvvəl Samsung şirkəti yeni Galaxy S23 seriyasını təqdim edib. Yeni seriyanın hər üç modelini Snapdragon 8 Gen 2 çipseti ilə təchiz edən şirkət, oyun performansını artırmaq üçün daha bir yenilik edib. Belə ki, artıq Samsung modelləri şarjda olarkən birbaşa adapter ilə işləyə biləcək. İlk öncə Galaxy S23, Galaxy S23+ və Galaxy S23 Ultra modellərinə əlavə edilən funksiya mərhələli formada digər Samsung modelləri üçün də əlçatan olacaq.
Artıq bir neçə Samsung modeli şarjda birbaşa adapter ilə işləyə bilir
Hamıya məlumdur ki, bir çox orta seqment smartfon istifadəçisi oyun oynayarkən smartfonlarının həddindən artıq isindiyindən şikayət edir. Hətta bəzən smartfonlar çox isindiyi üçün yararsız hala da düşür. Bunun əsas səbəbi isə smartfonların batareyasının gərgin şəraitdə istifadə edilməsidir. Belə ki, istifadəçi smartfonu şarja taxır və saatlarla oyun oynayır. Bu zaman isə batareya faizi bəzən 100% olsa da, enerji çox istifadə edildiyi üçün qızmağa başlayır, hətta şişir. Samsung şirkəti isə istifadəçilərin bu şikayətlərini nəzərə alaraq yeni Pause USB Power Delivery funksiyasını elan edib. Bu funksiya, Samsung modellərindəki Game Booster tətbiqinin daxilində yerləşir. Beləliklə yeni funksiya ilə artıq Samsung modelləri şarjda olarkən birbaşa adapter vasitəsilə işləməyi aktiv edə biləcək. Yəni, smartfon enerjini batareyadan yox birbaşa olaraq adapterdən alacaq. Nəticədə isə, batareyanın həddindən artıq qızması problemi aradan qalxacaq. Yalnız oyunlarda işləyən yeni funksiya həm də batareya ömrünü uzatmağa kömək edəcək.
Hələlik bu funksiya Galaxy S23 seriyası üçün əlçatan olsa da, bəzi istifadəçilər yeni funksiyanın Samsung Galaxy A73 5G, Galaxy Z Fold 2, Galaxy Z Fold 3 və Galaxy Z Fold 4 smartfonlarında da göründüyünü iddia edib. Onu da qeyd edək ki, yeni funksiya Game Booster tətbiqinin 5.0.03.0 versiyanı tələb edir. Hələlik funksiyanın dəqiq olaraq hansı modellərə nə zaman əlavə ediləcəyi barədə məlumat olmasa da, güman edilir ki, yaxın günlərdə Samsung bu məlumatları bizlərlə bölüşəcək. Ehtimal ki, bu funksiya aktiv olduqda batareya daha aşağı vatt dəyərlərində şarj olacaq. Daha çox güc sistemin işləməsinə ayrılacaq.
