Xiaomi şirkətinə məxsus POCO brendi özünün X seriyasını ötən gün yeniləyib. Belə ki, POCO X5 və POCO X5 Pro modelləri rəsmi olaraq təqdim edilib. Əslində, bu cihazlar bizim üçün uzun bir müddətdir həm texniki, həm dizayn cəhətdən məlumdur. Cihazlar uzun bir müddət əvvəl sızdırıldığından təqdimatdan sonra bəlli olan detallar yalnız xüsusiyyətlərin təsdiqlənməsi xarakteri daşıyır. Gəlin mövzunu çox uzatmadan smartfonlarla yaxından tanış olmağa başlayaq.
POCO X5 Pro 5G modeli Redmi Note 12 Pro Speed Edition modelinin təkrar brendləşdirilmiş variantıdır. Dizaynı və texniki xüsusiyyətləri ümumi aspektdən baxdıqda ideal görünür. Sələfi POCO X4 Pro 5G modelindən daha yaxşı çipset və kamera performansına malikdir. POCO X5 5G modeli isə yenə Çindəki Redmi Note 12 5G modeli ilə oxşarlıq daşıyır. Lakin texniki cəhətdən bəzi dəyişikliklərə sahibdir. Yaxşı bəs POCO X5 seriyası hansı texniki xüsusiyyətlərə sahibdir?
POCO X5 seriyası biz nə vəd edir?
POCO X5 Pro 5G modeli öz gücünü Snapdragon 778G 5G çipsetindən alarkən, POCO X5 5G modelində Snapdragon 695 5G çipseti işlədilib. Hər iki cihazda ümumi performansa təsir etməsi baxımından UFS 2.2 və LPDDR4X yaddaş çipləri işlədilib. POCO X5 Pro 5G modelində olmasa da POCO X5 5G modelində 1TB-a qədər MicroSD dəstəyi mövcuddur.
POCO X5 Pro 5G modelində 6.67 düymlük AMOLED ekran paneli işlədilib. FHD+ təsvir ölçülü bu ekran paneli 120Hz görüntü yeniləmə tezliyinə və 900 nit parlaqlığa malikdir. Ekran paneli göz qoruması üçün 1920Hz tezlikli PWM texnologiyasını dəstəkləyirlər. Bu cihazda işlədilən ekran paneli eyni zamanda Dolby Vision xüsusiyyətinə də malikdir ki, ən yüksək istifadəçi təcrübəsi yaşatmağı hədəfləyir. POCO X5 5G modelində də 6.67 düymlük AMOLED ekran paneli işlədilib, lakin ekranın gövdə nisbəti daha aşağıdır. 120Hz görüntü yeniləmə tezliyinə malik ekranı 1200 nit parlaqlığa malikdir. Bu ekran paneli də SGS göz qoruması sertifikatını və.s əldə edib.
POCO X5 Pro 5G modelində ISOCELL HM2 108MP əsas, 8MP 120° ultra-geniş bucaqlı və 2MP makro kameraları işlədilib. POCO X5 5G modelində əsas kamera 48MP təsvir ölçülü naməlum sensorla əvəzlənib. Xüsusilə texniki cəhətdən kamera konfiqurasiyası POCO X4 Pro 5G modeli ilə müqayisədə dəyişməmiş kimi görünür. Lakin Snapdragon 778G çipseti işləri dəyişir. POCO X4 Pro 5G modelindəki Snapdragon 695 5G çipsetinin görüntü emalı çipi (ISP) zəif olduğu üçün, cihazın kamera performansı aşağı düşürdü. Təsəvvür edin ki, cihaz maksimum 1080P keyfiyyətdə 30FPS videolarla məhdudlaşmışdı. Lakin POCO X5 Pro 5G modeli rahatlıqla 4K keyfiyyətdə 30FPS-ə qədər videolar çəkə biləcək. Eyni zamanda görüntü keyfiyyəti də nisbətən təkmilləşdiriləcək.
POCO X5 seriyası daxilində hər iki cihaz 5000 mAs batareya ilə təchiz edilib. Lakin sadə modeldə 33 vatt şarj dəstəyi təklif edilərkən, daha güclü modeldə 67 vatt sürətli şarj mövcuddur. Hər iki cihazda 3.5mm qulaqlıq girişi quraşdırılıb. Lakin sadə modeldə POCO X5 Pro 5G modelindən fərqli olaraq həqiqi “stereo” səs ucaldanlar mövcud deyil. Qeydlərə görə NFC dəstəyi də yalnız POCO X5 Pro 5G modelində mövcuddur. POCO X5 Pro 5G modeli qutudan Android 12 üzərində MIUI 14 interfeysi ilə gələrkən, digər model MIUI 13 ilə qarşımıza çıxacaq.
Smartfonların qiyməti
POCO X5 Pro 5G
- 6-128GB 249$
- 8-256GB 299$
POCO X5 5G
- 6-128GB 199$
- 8-256GB 249$
Fotolar: https://youtu.be/Uq7qLpML1C4 | POCO X5 & X5 Pro Unboxing and Review - TechNick
