Süni intellekt, inkişafı ilə insanların gördüyü işləri daha qısa müddət ərzində görməyə başlayıb. İnsanların saatlar və ya günlər ərzində gördüyü işləri bir neçə saniyəyə həll edən süni intellektdən, insan səsini təqlid edən süni intellektə qədər hər növ texnologiyanın olduğu bir vaxta gəlib çatmışıq. Bu ilin fevral ayında isə tarixdə ilk dəfə robot vəkil ABŞ-da yol hərəkəti qaydası ilə bağlı işdə müttəhimin vəkili olmağa hazırlaşır.
Məhkəmə zamanı qulaqlıq vasitəsilə müttəhimə məsləhət verməsi gözlənilən süni intellekt məhkəmədə arqumentləri dinləyəcək və müttəhimin verə biləcəyi ən yaxşı cavabları təhlil edəcək. Smartfonda işləyən texnologiya təqsirləndirilən şəxsin kimliyini gizli saxlayan DoNotPay adlı texnoloji startap tərəfindən hazırlanıb.
İşin ən maraqlı tərəflərindən biri də startapın daha çox müştəri cəlb etmək üçün 1 milyon dollar vəd etməsidir. DoNotPay startapının baş direktoru Joshua Browder Twitter-də süni intellekti “daha yüksək məhkəmədə” görmək istədiyini bildirib. Həmçinin Browder adi məhkəmə işlərinin robot üçün çox kiçik olduğunu, buna görə də daha ciddi bir təklif istədiklərini deyir.
“ABŞ Ali Məhkəməsində davam edən bir işdə biz robot vəkilimizin dediklərini təkrarlayaraq AirPods taxan və müdafiəni ona buraxan istənilən vəkilə və ya müttəhimə bir milyon dollar ödəyəcəyik.“
Browder
Browder həmçinin deyir ki, robot vəkil işi uduzsa, cərimələri DoNotPay ödəyəcək. Müəssisənin investorları arasında Andreessen Horowitz, Crew Capital və Founders Fund kimi məşhur vençur kapitalı firmaları da var. Müəssisə bu şirkətlərdən ümumilikdə 27,7 milyon dollar vəsait cəlb edib. Digər tərəfdən, ABŞ-da bir çox məhkəmə zallarında bu cür texnologiyalardan istifadə etmək qanunsuzdur. Bununla belə, bəzi məhkəmələr müttəhimlərə bluetooth ilə işləyən eşitmə cihazları taxmağa icazə verir. DoNotPay rəsmiləri də süni intellekt alətinin bu fürsətdən yararlana biləcəyini düşünürlər.
Brawder-in fikrincə, son məqsəd bəzi hallarda həddindən artıq yüksək ödənişlər tələb edən vəkillərə ehtiyacı aradan qaldırmaqdır. Müdafiəni pulsuz etmək istədiklərini ifadə edən Browder, bu yolla “hüquqi təmsilçiliyi demokratikləşdirməyi” hədəflədiklərini deyir.
Startap ekosistemi xəbərlərini "İnformasiya və Rəqəmsal İnkişaf Agentliyi" ilə tərəfdaşlığımız çərçivəsində oxuyursunuz.
