Bir müddət əvvəl Avropa Birliyinin yeni qərarı ilə smartfonlardan tutmuş notbuklara qədər bir çox cihazın Type-C girişi ilə təchiz edilməsi standartlaşdırılmışdı. Type-C məcburiyyəti başda Apple şirkəti üçün bəzi çətinliklər yaratsa da, istifadəçilər nəzərən baxdıqda olduqca vacib bir məcburiyyət idi. Ona görə də heç kim bu qərara etiraz etmədi. İndi isə Avropa Birliyi texnoloji avadanlıqlar üçün dəyişdirilə bilən batareyaları bərpa etməklə bağlı gündəmə gəlib. Yeni qərarla birlikdə smartfon və notbukların uzunömürlü istifadəsini artırmaq məqsədilə arxası açılaraq rahatlıqla çıxarılıb dəyişdirilə bilən batareyalar geri qaytarıla bilər.
Avropa Birliyi batareyaların tərkibinə qədər müdaxilə etməyə qətiyyətli davranır
Avropa Birliyi rahatlıqla dəyişdirilə bilən batareyaları bərpa etmək üçün yeni tənzimləməni artıq təklif edib. Qərarın qəbul edilib-edilməməsi sual altında olsa da batareyaların tərkibi və təkrar emalı ilə bağlı bəzi qərarlar artıq verilib. Belə ki, şirkətlər 16% kobalt, 85% qurğuşun, 6% litium, 6% nikel tərkibə malik təkrar emal edilmiş elementlərdən istifadə etməlidirlər. Yəni ümumiləşdirsək, 2023-ci ilə qədər bütün elektron avadanlıqlarda 45%, 2030-cu ilə qədər isə 73% tərkib hissəsi təkrar emal edilmiş elementlərdən ibarət batareya işlədilməlidir.
Dəyişdirilə bilən batareya məcburiyyətinin ortaya çıxmasına səbəb isə məhz texnoloji avadanlıqları uzun müddət istifadəyə yararlı vəziyyətə gətirməkdir. Təklif edilən qərara görə cihazların arxa qapağı ya ənənəvi üsullarla açıla bilən, ya da vint (şurup) ilə rahatlıqla açılan vəziyyətdə olmalıdır. Yeni qanunun tələbləri isə təkcə elektron cihazlara aid deyil, elektromobillərə də şamil olunub. Nəticə etibarilə batareyalar 2024-cü ilin əvvəlindən başlayaraq geridə heç bir karbon ayaq izi qoymamalıdırlar. Şirkətlər isə batareyalarla bağlı proseslərdə atılan hər bir addımı hesabat verməlidirlər.
Ən qəliz məsələ isə Avropa Birliyi arxası açılaraq dəyişdirilə bilən batareyaları məcbur edəcəyi təqdirdə smartfon istehsalçıları tərəfində yaşanacaq. Qərar çox təəccüblü də olsa artıq təsdiqlənməyi gözləyir. Təsdiqləndikdən sonra isə şirkətlər sözün əsl mənasında keçmişə qayıdıb smartfonların dizaynını başdan işləməli olacaqlar. Çünki, dəyişdirilə bilən batareyalar üçün açıla bilən arxa qapaqlar suya qarşı davamlılığın itməsi, qalınlığın artması kimi problemlərə səbəb olacaqlar. Ən azından notbuklar üçün bunun tətbiqi nisbətən daha sadə mühəndislik tətbiq edəcək. Smartfonlarda isə bu tip məcburiyyətlər batareyanın kiçilməsinə qədər mənfi hallarla nəticələnə bilər.
