iCloud xidmətinin hal-hazırda təxminən 1 milyarda yaxın istifadəçisi var. MacRumors mənbəsinin verdiyi məlumata görə şirkətin 2020-ci ildə istifadəyə verdiyi Windows üçün iCloud proqramında qəribə problem ortaya çıxıb. Belə ki, iPhone istifadəçiləri öz qalareyalarında onlara aid olmayan şəkillərin ortaya çıxdığını iddia edir.
Qeyd edək ki, Apple şirkətinin Windows üçün istifadəyə verdiyi iCloud proqramı istifadəçilərə kompüterlərindən öz fotolarına, videolarına, fayllarına və digər vacib məlumatlara daxil olmaq imkan verir. Lakin mənbənin verdiyi məlumata əsasən iPhone-da saxlanılan və iCloud proqramı ilə sinxronlaşdırılan video və şəkillər qaralır və ya onlaraq baxmaq mümkün olmur. Təəccüblüsü isə odur ki, istifadəçilər qaralan şəkil və ya videolara baxmağa cəhd etdikdə qalareyada onlara aid olmayan şəkil və ya videolarla qarşılaşırlar. Belə ki, sleep_ghost adlı istifadəçi MacRumors mənbəsinə iCloud-da naməlum futbol komandasının oyun görüntülərini və başqalarının fotolarını gördüyünü bildirib. Onun sözlərinə görə bu görüntülər digər iCloud hesablarından onun hesabına əlavə edilir. Hətta bir neçə istifadəçi də eyni problem ilə qarşılaşdığını bildirib.
Hələlik bu problem ilə yalnız bir neçə iPhone 13 və iPhone 14 Pro qarşılaşıb. Digər bir qəribə şey isə bir neçə nəfərin də eyni problemlə bağlı Apple-a məlumat verməsidir. Problem isə Windows 11 və Windows 10 olmaqla hər iki əməliyyat sisteminə sahib kompüterlərdə və qeydlərə görə yalnız HDR və HEVC kimi müəyyən parametrləri aktivləşdirilən cihazlara təsir göstərir. Hətta onların sözlərinə görə proqramı yenidən quraşdırsalar da problem hələ də davam edib. İstifadəçilər problemin serverdən qaynaqlandığını düşünür, lakin Apple bu məsələ ilə bağlı heç bir açıqlama verməyib.
