Volkswagen hələ satışa çıxarmadığı yeni elektrikli ID. Polo GTI modelinin texniki göstəricilərini yenidən nəzərdən keçirə bilər. Buna səbəb avtomobilin maksimum sürətinin 175 km/saatla məhdudlaşdırılması və xüsusilə Almaniyadakı GTI həvəskarlarının buna etiraz etməsidir.
Müzakirələrin əsas səbəblərindən biri yeni modelin Volkswagen-in 50 il əvvəl istehsal etdiyi ilk Golf GTI-dan belə aşağı maksimum sürətə sahib olmasıdır. 1976-cı ildə təqdim edilən ilk Golf GTI 1,6 litrlik atmosfer mühərriki ilə cəmi 110 at gücü hasil etsə də, 182 km/saat maksimum sürətə çata bilirdi.
Yeni elektrikli ID. Polo GTI isə 226 at gücünə malikdir, lakin onun maksimal sürəti 175 km/saatla məhdudlaşdırılıb. Başqa sözlə, yeni model ilk Golf GTI-dan 116 at gücü daha güclü olsa da, maksimum sürətdə ondan 7 km/saat geri qalır.
Məhz bu müqayisə GTI həvəskarlarının narazılığını artırıb. Volkswagen İdarə Heyətinin üzvü Kay Grünitz avtomobillə bağlı ümumi rəylərin əsasən müsbət olduğunu, lakin tənqidlərin böyük hissəsinin 175 km/saatlıq sürət məhdudiyyətinə yönəldiyini bildirib. Şirkət hazırda bu həddi artırmağın mümkün olub-olmadığını araşdırır.
Lakin elektrikli avtomobildə maksimum sürəti artırmaq sadəcə proqram təminatındakı məhdudiyyəti aradan qaldırmaq qədər asan deyil. Yüksək sürətlə uzun müddət hərəkət batareya, elektrik mühərriki və ötürmə sistemi üzərində daha böyük istilik və mexaniki yük yaradır. Buna görə avtomobilin soyutma sistemi və digər komponentlərinin də daha yüksək sürətə uyğun olması tələb olunur.
ID. Polo GTI bəzi göstəricilərdə əsas rəqiblərindən Peugeot e-208 GTI-dan da geri qalır. Volkswagen-in elektrikli GTI modeli 0-dan 100 km/saata 6,8 saniyəyə sürətlənir. Peugeot e-208 GTI isə bunu 5,5 saniyəyə edir və 180 km/saat maksimum sürətə çata bilir.
Volkswagen hələlik ID. Polo GTI-ın sürət limitinin dəyişdirilməsi ilə bağlı yekun qərar verməyib. Mütəxəssislər sürətin, məsələn, 185 km/saata yüksəldilməsinin yeni modeli həm 1976-cı il Golf GTI-dan, həm də Peugeot rəqibindən daha sürətli edə biləcəyini düşünürlər.
ID. Polo GTI üçün ilkin sifarişlərin 2026-cı ilin payızında başlaması gözlənilir. Avtomobilin başlanğıc qiymətinin isə 33 min avrodan aşağı olması planlaşdırılır.
