Ağcaqanad probleminə texnoloji həll təklif edən Photon Matrix sisteminin kütləvi istehsalına başlanılıb. İstehsalçı şirkətin açıqlamasına görə, cihazların ilk partiyasının avqustun sonunda alıcılara göndərilməsi planlaşdırılır. Məhsulu artıq kraudfandinq kampaniyasına qoşulmadan istehsalçının rəsmi saytı üzərindən əvvəlcədən sifariş etmək mümkündür.
Photon Matrix ağcaqanadları havada aşkar edərək lazer vasitəsilə zərərsizləşdirmək üçün xüsusi hədəfləmə sistemindən istifadə edir. Cihazın 6 metrədək məsafədə və 90 dərəcə üfüqi görüş bucağında uçan ağcaqanadları müəyyənləşdirə bildiyi bildirilir. Hədəfin yerini dəqiq müəyyən etmək üçün LiDAR, millimetr dalğalı radar və süni intellekt dəstəkli kompüter görməsi texnologiyaları birlikdə işləyir.
Sistem 2-20 millimetr ölçüsündə olan və saniyədə 1 metrədək sürətlə hərəkət edən uçan həşəratları aşkar edə bilir. Hədəf müəyyən edildikdən sonra sistem lazer şüasını onun üzərinə yönəldərək ağcaqanadı havadaca zərərsizləşdirir.
Photon Matrix iki fərqli versiyada satışa çıxarılır. Ev şəraitində istifadə üçün nəzərdə tutulan standart model infraqırmızı lazer texnologiyasından istifadə edir və 988 dollara təklif olunur. Açıq hava, bağ, sənaye və kommersiya məkanları üçün nəzərdə tutulan Pro versiya isə mavi lazerlə təchiz edilib və 1088 dollar qiymətə satılır.
Hər iki versiyanın əsas texniki göstəriciləri eynidir. Standart və Pro modelləri 6 metrədək məsafədə işləyir, 90 dərəcə üfüqi sahəni izləyir və eyni sensor sistemlərindən istifadə edir. Onların arasındakı əsas fərq lazer şüasının görünən və ya görünməyən olmasıdır.
İstehsalçı daha əvvəl Photon Matrix-in ağcaqanadları uçuş zamanı necə aşkar edib zərərsizləşdirdiyini nümayiş etdirən test videoları da yayımlayıb. Bununla belə, cihazın real gündəlik şəraitdə nə dərəcədə effektiv işləyəcəyi ilk məhsullar istifadəçilərə çatdırıldıqdan sonra daha aydın olacaq.
