BMW Euro NCAP kimi avtomobil təhlükəsizliyi testlərində maksimum 5 ulduz əldə etməyi artıq əsas prioritetlərindən biri hesab etməyəcək. Alman avtomobil istehsalçısı bunun əvəzinə avtomobillərin fiziki təhlükəsizliyinə, kuzovun möhkəmliyinə və sürüş dinamikasına daha çox diqqət ayıracağını bildirir.
Strategiyadakı bu dəyişiklik BMW Avstraliyanın məhsul meneceri Brendan Michel və şirkətin Avstraliya üzrə baş direktoru Vikram Pawah tərəfindən açıqlanıb. Brendan Michel-in sözlərinə görə, təhlükəsizlik testlərinin son illərdə dəyişən meyarları maksimum 5 ulduz əldə etməyi getdikcə çətinləşdirir.
BMW rəsmisi bildirib ki, qiymətləndirmə artıq yalnız şassinin quruluşu, zərbə enerjisini udan zonalar və qəza zamanı sərnişinlərin qorunması kimi klassik təhlükəsizlik göstəricilərindən ibarət deyil. Avtomobildə arxa oturacaqda uşağın unudulması zamanı xəbərdarlıq edən sistem kimi müxtəlif elektron funksiyaların olub-olmaması da yekun nəticəyə təsir göstərir. Michel BMW-nin son dərəcə təhlükəsiz şassilər hazırladığına əmin olduqlarını vurğulayıb.
Bu yanaşmanın arxasında Avstraliyadakı ANCAP və Avropadakı Euro NCAP proqramlarının təhlükəsizlik meyarlarını getdikcə sərtləşdirməsi dayanır. Müasir qiymətləndirmələrdə avtomobilin qəza zamanı sərnişinləri necə qoruması ilə yanaşı, qəzaların qarşısını almağa kömək edən elektron sürücü yardım sistemlərinə də böyük əhəmiyyət verilir.
BMW isə bəzi yeni tələblərin real sürüş təhlükəsizliyinə birbaşa təsirinin mübahisəli olduğunu düşünür. Şirkət bütün modellərinin təhlükəsizlik testlərində maksimum nəticə əldə etməməsinə baxmayaraq, avtomobillərinin yüksək səviyyədə təhlükəsiz olduğunu bildirir.
Maraqlıdır ki, BMW son beş ildə Almaniyanın üç böyük premium avtomobil istehsalçısı — BMW, Mercedes-Benz və Audi arasında təhlükəsizlik testlərində 5 ulduzdan aşağı nəticə alan yeganə marka olub. BMW rəhbərliyi bunun avtomobillərin fiziki baxımdan zəif olması ilə deyil, test və qiymətləndirmə prosedurlarının dəyişməsi ilə əlaqəli olduğunu bildirir.
Bununla belə, BMW təhlükəsizlik testlərində maksimum reytinq əldə etməyi prioritet hesab etməyən ilk avtomobil istehsalçısı deyil. Test proqramlarında elektron yardım və xəbərdarlıq sistemlərinin çəkisi artdıqca digər istehsalçıların da oxşar yanaşma seçməsi mümkündür.
