Çin mərkəzli texnologiya nəhəngi Huawei, ABŞ-ın sanksiyalarına və çip tədarükü ilə bağlı çətinliklərə baxmayaraq, Kirin prosessorları ilə təchiz edilmiş məhsulları ilə qlobal bazara qayıtmağı planlaşdırır. Şirkətin innovativ məhsulları ilə qlobal bazar payını bərpa etməyi hədəflədiyi bildirilir. Nikkei Asia-nın məlumatına görə, Huawei öz məhsullarını təqdim etdiyi bazarların sayını artırmağa başlayıb. Bu addım şirkətin smartfon sənayesində əvvəlki güclü mövqeyinə qayıtmasına kömək edə bilər.
Huawei keçən ilin dekabrında Mate X6 qatlana bilən telefon, Nova 13 seriyası və FreeBuds Pro 4 daxil olmaqla bir sıra məhsullarını qlobal miqyasda təqdim edib. Bu cihazlar Dubay, Honq-Konq, Kuala-Lumpur, Filippin, Cənubi Afrika və Avropa kimi yüksək profilli yerlərdə istifadəyə verilib. Bu məhsullar arasında xüsusilə Mate X6 böyük diqqət çəkib. Texnologiya nəhəngi tez-tez yeni məhsullarını qlobal miqyasda təqdim etsə də, iki illik fasilədən sonra Mate X6 qatlana bilən cihazını qlobal miqyasda təqdim etmişdi. Belə ki, şirkət sonuncu dəfə Mate X3 modeli təqdim edib.
Huawei-nin geri dönüş planlarının mərkəzində özünü inkişaf etdirdiyi Kirin prosessorları dayanır. Mate X6-da istifadə edilən güclü Kirin 9020 5G çipi performans baxımından xarici rəqiblərini geridə qoysa da, əvvəlki nəsil Kirin prosessorları ilə müqayisədə xeyli irəliləyiş edir. Oxşar strategiya orta seqment Nova 13 seriyalı telefonlara da tətbiq edilir. Bu qurğular Kirin 8000 seriyalı prosessorlarla təchiz edilib. Ümumiyyətlə, ABŞ sanksiyalarından əvvəl Huawei qlobal smartfon bazarında lider adlardan biri olmağı bacarmışdı. Sanksiyalardan sonra dərin çöküş yaşayaraq xeyli geriləmişdi. Şirkət 2023-cü ildə Mate 60 seriyası ilə yüksəlməyə başlasa da, qlobal bazarda geri qayıtmaq şansı olmadı. Huawei, sərt məhdudiyyətlərə görə Mate 60 telefonlarını qlobal miqyasda satışa çıxarmadı.
