Nike brendi bu dəfə yenilik edərək demək olar ki, tamamilə 3D çap texnologiyası ilə istehsal olunmuş ayaqqabısını təqdim edib. Belə ki, Nike Air Max 1000 adlanan bu model brendin 3D çap ilə istehsal etdiyi ilk modeli olduğu üçün diqqət cəlb edib.
Keçən həftəsonu Las-Veqasda ComplexCon sərgisində ilk dəfə təqdim edilən idman ayaqqabıları 3D çap ayaqqabıları üzrə ixtisaslaşmış Zellerfeld şirkəti ilə birgə istehsal edilib. Hazırda ümumi satışa çıxarılmayan ayaqqabının mağaza vitrinlərində görünüb-görünməyəcəyi hələlik məlum deyil. Qeyd edək ki, Air Max 1000, ilk dəfə 1987-ci ildə buraxılan və dabanında hava yastığı olan Air Max 1-in dizayn xəttini davam etdirir. Bu hava yastığı 3D çap üsulu ilə istehsal edilməsə də, ayaqqabının qalan hissəsi bütövlükdə elastik materialla 3D çap üsulu ilə istehsal edilib.
Müxtəlif sıxlıq və teksturalı təbəqələrdən istifadə etməklə, Air Max 1000 tabanı möhkəm və dəstəkləyici, üst hissəsi isə daha çevik olmaq üçün hazırlanmışdır. Bununla da ayaqqabılar üçün bağa ehtiyac aradan qalxır. Nike bildirir ki, 3D çap texnologiyası ilə ənənəvi üsullarla mümkün olmayan mürəkkəb naxışları ayaqqabılara tətbiq etmək mümkün olub. Tədbirdə Nike, Air Max 1000 modelini ilkin olaraq parlaq qırmızı rəngdə nümayiş etdirib. Daha sonra o, idman ayaqqabısının narıncı, ağ, mavi və qara rəngləri, həmçinin yaşıl rənglərini elan edib. Ayaqqabı hələlik 1000 ədəd məhdud sayda olacaq, lakin qiyməti məlum deyil.
