FBI, “Çinli hakerlər”in telekommunikasiya nəhənglərinin şəbəkələrinə sızdığını və milyonlarla məlumatı ələ keçirdiyini təsdiqləyib. Maraqlısı budur ki, qurum, bu hakerlərin həm də Çin hökuməti tərəfindən dəstəkləndiyini bildirir.
ABŞ hökuməti Çinli hakerlərin mühüm telekommunikasiya şəbəkələrinə sızdığını, dinləmə sistemlərinə giriş əldə etdiyini və bu prosesdə böyük məlumat oğurluğu törətdiyini açıqlayıb. ABŞ-da bir çox telekommunikasiya şirkətinin şəbəkələrini hədəf alan bu kiberhücumların geniş miqyaslı casusluq fəaliyyətinin bir hissəsi olduğu sənədləşdirilib. FBI, Kibertəhlükəsizlik və İnfrastruktur Təhlükəsizliyi Agentliyi (CISA) bildirib ki, Çinlə əlaqəli hakerlər AT&T, Lumen və Verizon kimi böyük telekommunikasiya provayderlərinin sistemlərinə daxil olub, internet trafiki və zəng qeydlərini toplayıblar. Bu hakerlər aylardır bu şəbəkələrdə aktiv olaraq, milyonlarla amerikalının məlumatlarına daxil olublar.
Hücumların hədəfi təkcə istifadəçi məlumatları ilə məhdudlaşmayıb. Belə ki, bəzi şəxslərin şəxsi ünsiyyətləri də pozulub. Bu şəxslərin əksəriyyətinin isə dövlət və siyasi fəaliyyətlə məşğul olan şəxslər olduğu bildirilib. Çinin “Salt Typhoon” haker qrupunun qanuni ələ keçirmə tələblərinə uyğun olaraq bəzi məlumatları oğurladığı bildirilir. ABŞ hökumət rəsmiləri telekommunikasiya sektorunda genişmiqyaslı təhlükəsizlik pozuntusunun olduğunu və bu cür hadisələrin qarşısını almaq üçün daha güclü kibermüdafiə vasitələrinin inkişaf etdirilməli olduğunu vurğulayıblar.
