İnnovasiya və Rəqəmsal İnkişaf Agentliyinin (İRİA) təşkilatçılığı, “PAŞA Holding”in dəstəyi, “Vanguards Ventures” və “Evercity.io” ilə tərəfdaşlıq çərçivəsində BMT-nin İqlim Dəyişmələri üzrə Çərçivə Konvensiyasının Tərəflər Konfransı COP29-da innovasiya və rəqəmsallaşma mövzularında bir sıra panel sessiyaları, təqdimatlar və vörkşoplar baş tutacaq, eyni zamanda konfrans müddəti ərzində İRİA-nın stendi fəaliyyət göstərəcək.
Silsilə tədbirlər çərçivəsində 13 noyabr tarixində “Google Developers Group Baku”, “ProductTank Baku”, “Friends of Figma, Baku”, “Alas Academy” kimi yerli texnologiya icmaları tərəfindən texnologiyaların ekologiya və iqlimə təsiri mövzusunda müxtəlif təqdimatlar ediləcək.
Eləcə də həmin gün “Prosol” MMC, Azərbaycan Kibertəhlükəsizlik Təşkilatları Assosiasiyası və Azərbaycan Kibertəhlükəsizlik Mərkəzinin nümayəndələri tərəfindən “Kiberhücumlar ətraf mühit üçün hansı təhlükələr yaradır?” mövzusunda panel diskussiyası keçiriləcək.
Daha sonra 15 noyabr tarixində İRİA, “Google” şirkəti və “Farm Forward” startapının təsisçisi Altun Tarverdiyevin iştirakı ilə dəyirmi masa təşkil olunacaq.
16 noyabr tarixində “Rəqəmsal yaşıl üfüqlər: dövlət sektoru və texnologiyanın dayanıqlı gələcək üçün inteqrasiyası” və “İqlim fəaliyyəti üçün innovasiya və rəqəmsallaşma” mövzularında panel müzakirələri və çıxışlar baş tutacaq. Bu tədbirlərdə rəqəmsal transformasiya və innovasiyanın gücü ilə ətraf mühitin qorunması istiqamətində Azərbaycanın fəaliyyəti və bu xüsusda İRİA-nın digər dövlət qurumları ilə birgə təşviq etdiyi dayanıqlı rəqəmsal inkişaf gündəliyi müzakirə ediləcək.
Bununla yanaşı, eyni gündə “Sabancı Holding”in və “EIR Climate-KIC”in nümayəndələri ilə birgə yerli şirkətlərə iqlim texnologiyalarının istifadəsi istiqamətində öz təcrübələrini bölüşəcəklər. Tədbirlər silsiləsinin davamı olaraq “EIT Climate-KIC”in təşəbbüsü ilə “Viveka” şirkəti tərəfindən keçirilən “4+1 ClimAccelerator” proqramı çərçivəsində seçilmiş startapların təqdimatı baş tutacaq. Daha sonra bu startaplarla yerli şirkətlər arasında şəbəkələşmə tədbiri baş tutacaq. Günün sonuna doğru “Viveka” şirkətinin nümayəndələri tərəfindən iqlim sahəsindəki gənc yerli startaplara strateji əməkdaşlıqların qurulması istiqamətində vörkşop keçirilməsi planlaşdırılıb.
Qeyd edək ki, COP29-un davam edəcəyi 11 gün ərzində İRİA-nın Yaşıl zonada stendi fəaliyyət göstərəcək. Stenddə tədbir qonaqları qurumun rəqəmsallaşma və innovasiya sahəsində gördüyü işlər, təşviq etdiyi layihələr haqqında ətraflı məlumat əldə edə, tərəfdaşlıq və əməkdaşlıq imkanlarını müzakirə edə biləcəklər.
