Apple-ın Avropa Birliyinin Rəqəmsal Bazarlar Aktını (DMA) pozduğuna görə cərimələnəcəyi bildirilir. Belə ki, şirkətin mübahisəli App Store qaydalarına görə Apple, Avropa Birliyi tərəfindən böyük məbləğdə pul cəzasına məruz qalacaq.
Bloomberg-in məlumatına görə, Avropa Birliyi komissiyası, Apple-ın App Store-da “anti yönləndirmə” təcrübələrinin rəqabətə mane olduğunu müəyyən edib. Belə ki, bu səbəbdən şirkətə rekord məbləğdə cərimə tətbiq edilə bilər. Keçən mart ayında Spotify-ın şikayəti əsasında başlayan araşdırma, Apple-ın istifadəçilərin App Store-dan kənarda daha sərfəli seçimlərə yönləndirməsini məhdudlaşdırdığını ortaya çıxarıb. Bu cür təcrübələr isə keçən il qüvvəyə minmiş Rəqəmsal Bazarlar Aktı ilə qeyri-qanuni hesab olunur. Xatırladaq ki, Apple mart ayında qanunsuz əməllərinə görə Avropa Birliyindən 1.84 milyard avro təxminən 2 milyard dollar cərimə almışdı.
İndi isə, Avropa Birliyi tərəfindən tətbiq ediləcək yeni cəzanın məbləği hələ açıqlanmasa da, DMA qaydalarına əsasən, şirkətlər illik qlobal gəlirlərinin 10 faizinə qədər, təkrar pozuntulara görə isə 20 faizədək cərimələnə bilərlər. Apple-ın keçənilki gəlirlərini nəzərə alsaq, bu cəza təxminən 38 milyard dollara çata bilər. Qeyd edək ki, cəzanın bu ay ərzində rəsmiləşməsi gözlənilir. Apple həmçinin Avropada alternativ proqram mağazalarının fəaliyyətini məhdudlaşdırdığı iddiası ilə də araşdırılır.
