Məzmuna keç

Bentley-nin ilk elektrikli avtomobili istehsala başlamadan satılıb qurtarıb

Bentley Torcal-a böyük maraq: 2027-ci ilin bütün istehsal kontenjanı dolub

Bentley-nin ilk elektrikli avtomobili istehsala başlamadan satılıb qurtarıb

Bentley-nin ilk tam elektrikli avtomobili Torcal hələ kütləvi istehsala başlamasa da, böyük maraqla qarşılanıb. Şirkətin açıqlamasına görə, elektrikli SUV üçün 2027-ci ilə ayrılmış bütün istehsal yerləri artıq sifariş edilib.

Volkswagen Qrupunun PPE elektrik platforması üzərində hazırlanan Torcal texniki baxımdan elektrikli Porsche Cayenne ilə yaxın xüsusiyyətlərə malikdir. Model Bentley-nin avtomobil sırasında Bentayga-dan aşağı pillədə yerləşir və markanın daha geniş müştəri auditoriyasına çıxmasına hesablanıb.

Torcal-ın ABŞ-də başlanğıc qiyməti 222 495 dollar təşkil edir. Müqayisə üçün, Bentayga-nın qiyməti 231 150 dollardan başlayır. Elektrikli modelin daha güclü Torcal S versiyası 262 695 dollara, First Edition versiyası isə 300 995 dollara təklif olunur.

InMerge 2026 — məqalə içi

Maraqlıdır ki, ilkin sifarişlərdə ən çox seçilən versiya məhz daha bahalı və yüksək performanslı Torcal S olub. Bentley-nin baş direktoru Frank-Steffen Vallizerin sözlərinə görə, yeni elektrikli SUV xüsusilə gənc alıcıların və əvvəllər Bentley avtomobili olmayan müştərilərin diqqətini çəkir.

Alıcılar avtomobilin fərdiləşdirilməsinə də böyük vəsait ayırırlar. Böyük Britaniyada Torcal-ın başlanğıc qiyməti 173 300 funt sterlinq olsa da, əlavə avadanlıq və fərdi dizayn seçimləri ilə bəzi sifarişlərin dəyəri 300 min funtu ötür.

Elektrikli modelə yüksək maraq Bentley üçün mühüm əhəmiyyət daşıyır. Şirkətin qlobal avtomobil tədarükü 2026-cı ilin ilk doqquz ayında 17,5 faiz azalaraq 5970 ədədə düşüb. Bentley Torcal-ın həm satışları canlandıracağını, həm də markaya yeni müştərilər qazandıracağını gözləyir.

Bununla belə, 2027-ci il üçün ayrılmış istehsal kontenjanının neçə avtomobildən ibarət olduğu açıqlanmayıb. Buna görə də ilkin sifarişlərin ümumi miqyasını qiymətləndirmək hələlik mümkün deyil.