Məzmuna keç

ABŞ-nin məxfi kəşfiyyat şəbəkəsində nasazlıq yaranıb

ABŞ kəşfiyyatının məxfi rabitə sistemi sıradan çıxıb: NSA səbəbləri araşdırır

ABŞ-nin məxfi kəşfiyyat şəbəkəsində nasazlıq yaranıb

ABŞ Milli Təhlükəsizlik Agentliyinin (NSA) məxfi məlumat mübadiləsi üçün istifadə etdiyi NSA Net şəbəkəsində ciddi texniki problem yaranıb. CNN-in hadisədən məlumatlı altı mənbəyə istinadən yaydığı xəbərə görə, yüksək məxfilik səviyyəsinə malik şəbəkənin fəaliyyəti müvəqqəti dayanıb.

NSA Net agentliyin əməkdaşlarına məxfi kəşfiyyat məlumatlarını təhlükəsiz şəkildə ötürmək və qurum daxilində paylaşmaq imkanı verir. Şəbəkədəki nasazlıq bu məlumat mübadiləsini çətinləşdirib.

Hazırda NSA mütəxəssisləri problemin miqyasını və yaranma səbəblərini müəyyənləşdirməyə çalışırlar. İlkin məlumatlara görə, hadisənin kiberhücum nəticəsində baş verdiyini göstərən sübut aşkarlanmayıb.

InMerge 2026 — məqalə içi

CNN-ə danışan hazırkı və keçmiş ABŞ rəsmiləri bildiriblər ki, nasazlıq agentliyin əsas kəşfiyyat imkanlarını iflic etməyib. Xüsusilə ABŞ Prezidenti Donald Trampın Çinə səfəri zamanı təcili kəşfiyyat məlumatlarının prezidentə çatdırılmasında problem gözlənilmir.

Maraqlıdır ki, bu, son bir həftə ərzində ABŞ-də kritik əhəmiyyətli infrastrukturlarda qeydə alınan ikinci böyük texniki nasazlıqdır.

Bundan əvvəl ölkənin aviasiya sistemində yaranan problem səbəbindən uçuşlar müvəqqəti dayandırılmış, rabitə və internet xidmətlərində də fasilələr müşahidə olunmuşdu.

ABŞ-nin nəqliyyat naziri Şon Daffi həmin hadisənin planlaşdırılmış texniki xidmət zamanı avadanlıqların modernləşdirilməsi ilə bağlı işlərdən qaynaqlandığını açıqlamışdı.

Bununla belə, aviasiya sistemindəki nasazlıqla NSA Net şəbəkəsinin fəaliyyətinin dayanması arasında hər hansı əlaqə təsdiqlənməyib.

NSA-nın məxfi şəbəkəsinin nə vaxt tam bərpa ediləcəyi və nasazlığın hansı texniki səbəbdən yarandığı hələlik açıqlanmayıb.