Təxminən on ildir ki, Avstraliyanın kiçik rəqəmsal səhiyyə şirkəti ResApp xəstənin öskürəyinin səsini öyrənməklə tənəffüs xəstəliklərinə diaqnoz qoya biləcək bir alqoritm hazırlamaq üzərində işləyir. Əvvəlcə sistem pnevmoniya diaqnozu üçün öyrədilib, lakin 2019-cu ilə qədər tədqiqatçılar texnologiyanı astma, krup və bronxioliti effektiv şəkildə ayırd edə biləcək qədər təkmilləşdiriblər.
2020-ci ildə pandemiya baş verəndə komanda tez bir şəkildə öskürəyin tanınması texnologiyasına COVID-19 diaqnozlarını daxil etməyə başlayıb. 2022-ci ilin əvvəlində COVID alqoritmləri sınaqdan keçirilib. Sınaqdan əldə edilən ilk məlumatlar isə təsirli dərəcədə yaxşı nəticələr ortaya qoyur.
Sınaq nəticəsində məlum olub ki, sistem yalnız öskürək səsindən müsbət COVID hallarının 92% dəqiqlikə müəyyən edə bilir. Eyni zamanda yoxlanılan hər 10 nəfərdən yalnız ikisi qeyri-dəqiq və ya yanlış mənfi diaqnoz alıb. ResApp bu nəticələri açıqladıqdan sonra Pfizer texnologiya üçün təxminən 65 milyon dollar təklif etdi. İndi isə, rəsmi satınalma elanına görə pandemiya dövründə yaxından tanıdığınız Pfizer şirkəti ResApp tətbiqini 179 milyon dollara almaq üçün müqavilə bağlayıb. Əczaçılıq sektorunda lider şirkətlərdən olan Pfizer şirkəti Kvinslend Universitetinin ResApp Health Limited startapı üçün potensialın böyük olduğunu bildirib.
Açıqlamada, Pfizer sözçüsü ilkin məlumatların ümidverici olduğunu və razılaşmanın şirkətin rəqəmsal sağlamlıq sahəsində izini genişləndirdiyini söylədi. ResApp komandası ümid edir ki, Pfizer tərəfindən satınalma texnologiyanın böyüməsinə və dünyanın ucqar yerlərində geniş şəkildə tətbiqinə kömək edəcək. Düşüncələrinizi şərhdə bizimlə paylaşa bilərsiniz!
