Nvidia Huangın yerinə yeni CEO axtarmağa başladı

Bloomberg-in məlumatına görə, şirkət rəhbərliyi Nvidia yeni CEO axtarışına başlayıb və Censen Huangın yerinə namizəd tapmaq üçün kənar firma ilə işləyir. Bu addım Huangın şəxsi həyatı ilə bağlı yeni iddiaların ardınca gəlir. Nvidia isə bu məlumatları rəsmən təsdiqləmir.

İdarə heyəti nə qərar verir?

The Wall Street Journal İdarə Heyətinin Huangı vəzifədən uzaqlaşdırmağa hazırlaşdığını yazıb. CNN-in iki mənbəyə istinadən verdiyi xəbərə görə, heyət 11 noyabrda Huangın gələcəyini müzakirə edib və görüş axşama qədər uzanıb. Müzakirələrdə daimi rəhbər tapılana qədər müvəqqəti CEO təyin etmək variantı da var.

Nvidia sözcüsü isə Huangın şirkəti fasiləsiz idarə etməyə davam edəcəyini bildirib. Bütün bu xəbərlər adı açıqlanmayan mənbələrə əsaslanır və hələlik rəsmi qərar yoxdur.

Qalmaqal casusluq iddiasından başladı

Hadisələr The New York Times-ın Huangın Nvidia müştərisi olan Sinqapur şirkəti Megaspeed-in keçmiş rəhbəri ilə münasibəti barədə yazısı ilə başladı. ABŞ rəsmiləri həmin şəxsin Çin kəşfiyyatı ilə əlaqəsi olduğundan şübhələnir. Sonradan NYT Huangın Nvidia-nın səhiyyə üzrə vitse-prezidenti ilə də münasibəti olduğunu iddia etdi. Nvidia və Huang bu ikinci iddianı təsdiqləməyib.

İdarə Heyəti artıq milli təhlükəsizlik məsələləri ilə bağlı müstəqil araşdırma başladıb. Huang ictimai üzr istəyərək araşdırmaya tam dəstək verəcəyini bildirib. Yeni iddialardan sonra Nvidia səhmləri seansdan kənar ticarətdə təxminən 7% ucuzlaşıb.

Nvidia-nın varis planı yoxdur

Bloomberg-ə görə, əvəzedici tapmaq çətin olacaq, çünki Huang 1993-cü ildən şirkəti həm texniki, həm də operativ səviyyədə şəxsən idarə edir. Nvidia-nın nə İdarə Heyətinin sədri, nə də əməliyyat direktoru var. Müvəqqəti rəhbər üçün maliyyə direktoru Colette Kress-in adı çəkilir, şirkətdən kənar namizədlər arasında isə Apple və Arm rəhbərləri göstərilir. Nvidia-nın rüblük hesabatı 17 noyabrda açıqlanacaq.

Mənbə Bloomberg