Alim Qasımov GTA 6-nın rəsmi radiosuna əlavə olundu!
Alim Qasımov və Fərqanə Qasımova GTA 6-da Kaleidoscope FM radiosunda Nelly Furtado-nun "Say It Right" mahnısını muğamla ifa edir.
Azərbaycan muğamı dünyanın ən böyük oyununa düşüb. Alim Qasımov GTA 6-nın rəsmi radiolarından biri olan Kaleidoscope FM-də səslənir. Xalq artisti qızı Fərqanə Qasımova ilə birlikdə Nelly Furtado-nun məşhur "Say It Right" mahnısını muğam üslubunda ifa edir. Oyun bu gün, noyabrın 19-da PlayStation 5 və Xbox Series X|S üçün satışa çıxıb.
GameSpot bu mahnını oyunun ən yaxşısı adlandırır
GameSpot-un idarəedici redaktoru Tamoor Hussain yazır ki, Kaleidoscope FM-də eşitdiyi ilk mahnı məhz Qasımovların ifası olub və hələ də onun ən sevdiyi mahnıdır. Muğamın şeir, melodiya və improvizasiyanı birləşdirdiyini qeyd edən müəllifə görə, bu ifa orijinal mahnının altındakı kədərli ruhu üzə çıxarır və ona daha dərin emosional ağırlıq verir. O, kamança, tar və dəf səsinin xanəndənin əlavələri ilə birləşərək ifanı sehrli etdiyini yazır.
Kaleidoscope FM necə radiodur?
Kaleidoscope FM dünyanın müxtəlif ölkələrindən olan sənətkarların məşhur mahnılara fərqli dillərdə hazırladığı ifaları səsləndirir. Radioda, məsələn, "Careless Whisper" mahnısının Cənubi Asiya versiyası da var. Rockstar-ın musiqi üzrə vitse-prezidenti Ivan Pavlovich GameSpot-a deyib ki, ideya studiyanın həmtəsisçisi Sam Houser-dən gəlib. Houser sevdiyi mahnıların xarici dillərdəki ifalarını çox sevir. Pavlovich-in sözlərinə görə, bəzi ölkələrdə hüquq sahiblərini tapmaq xüsusilə çətin olub.
Radionun aparıcısı da sürprizdir. Kaleidoscope FM-i Oskar mükafatı qalibi Jeremy Irons aparır. O, dünyanı gəzmiş və macəralarından danışan aparıcı obrazını canlandırır. Azərbaycanlı oyunçular isə sosial şəbəkələrdə Alim Qasımovun səsini oyunda eşidəndə böyük sevinc yaşadıqlarını paylaşırlar.
Mənbə GameSpot

