OpenAI-ın keçmiş texnologiya direktoru şirkəti Inkling 2 Small modelini təqdim etdi

OpenAI-ın keçmiş texnologiya direktoru Mira Murati-nin qurduğu Thinking Machines Lab Inkling 2 Small adlı yeni süni intellekt modelini təqdim edib. Model hazırda şirkətin Tinker platformasında əlçatandır. Tərtibatçılar onu orada sınaya və öz ehtiyaclarına görə əlavə öyrədə bilərlər.

Inkling 2 Small necə qurulub?

Modelin ümumi həcmi 594 milyard parametrdir. Lakin o, Mixture-of-Experts arxitekturası ilə işləyir və hər sorğuda yalnız 17 milyard parametr aktiv olur. Bu, modeli böyük ölçüsünə baxmayaraq sürətli və qənaətli edir. Kontekst pəncərəsi 1 milyon tokenə qədərdir, Tinker-də isə 64 min və 256 min tokenlik variantlar təklif olunur.

Inkling 2 Small mətnlə yanaşı şəkilləri də başa düşür. Bunun üçün 292 milyon parametrli ayrıca vizual kodlaşdırıcı istifadə olunur. Model mətni şəkildən tanıyır, infoqrafikləri oxuyur, obyektlərin yerini müəyyən edir və özü yaratdığı veb interfeysi və ya Blender səhnəsini yoxlaya bilir. Səs girişini isə dəstəkləmir.

Model yüz minlərlə uzun proqramlaşdırma tapşırığı üzərində gücləndirilmiş öyrənmə ilə hazırlanıb. Öyrədilərkən təkcə kodun işləyib-işləmədiyi deyil, problemlərin həll yolu da qiymətləndirilib.

Testlərdə Claude modelləri ilə yarışır

Artificial Analysis Intelligence Index-də Inkling 2 Small 31 bal toplayıb. Thinking Machines çəkilər açıqlandıqdan sonra modelin Çin xaricində hazırlanan açıq modellər arasında birinci olacağını gözləyir. Korporativ tapşırıqları ölçən Surge AI EnterpriseBench-CoreCraft testində model 71,8% nəticə ilə üçüncü olub. Burada onu yalnız Claude Fable 5.1 (77,4%) və Claude Opus 5.5 (74,4%) qabaqlayıb. Müştəri xidməti, kadrlar və IT tapşırıqlarını yoxlayan EnterpriseOps-Gym testində isə 46,8% ilə Claude Sonnet 5-i geridə qoyub.

Şirkət modelin çəkilərini təhlükəsizlik yoxlamalarından sonra Apache 2.0 lisenziyası ilə açıq paylaşmaq niyyətindədir. Lakin dəqiq tarix hələ açıqlanmayıb. Hal-hazırda model yalnız Tinker üzərindən işləyir.

Mənbə VentureBeat