SpaceX və Tesla birləşməsi dekabrda elan oluna bilər

SpaceX və Tesla birləşməsi üzrə danışıqlar irəliləyir. Bloomberg-in məsləhətləşmələrdən xəbərdar mənbələrə istinadla yazdığına görə, tərəflər indi qiymət və idarəetmə şərtlərini müzakirə edir. Saziş bu ilin dekabrında elan oluna bilər, lakin 2027-ci ilin əvvəlinə qalmaq ehtimalı da var. Şirkətlər xəbəri şərh etməyib.

Kim kimi alacaq?

Hazırkı dəyərlərə görə Tesla-nı SpaceX-in öz tərkibinə alması gözlənilir. SpaceX-in bazar dəyəri iyunda birjaya çıxdıqdan sonra 1,9 trilyon dolları keçib, Tesla-nınkı isə təxminən 1,5 trilyon dollardır. Səhmlərin hansı nisbətdə dəyişdiriləcəyi hələ danışıqlar mövzusudur. Saziş baş tutarsa, 2000-ci ildə Vodafone-un təxminən 183 milyard dollara Mannesmann-ı alması ilə qoyulan rekordu çox geridə qoyacaq.

Elon Musk Tesla-nın təxminən 20%-nə sahibdir, SpaceX-də isə xüsusi səhmlər vasitəsilə səslərin təxminən 85%-ni nəzarətdə saxlayır. Bu səbəbdən birləşmə Tesla investorlarını Musk-ın nəzarətinin daha güclü olduğu struktura keçirə bilər. Musk-ın 2025-ci ildəki mükafat paketində də birləşmə zamanı bəzi şərtlərin ləğv olunması və səhmlərin daha tez verilməsi nəzərdə tutulub.

SpaceX və Tesla birləşməsinin əsas maneəsi

Danışıqlarda əsas çətinliklərdən biri Tesla-nın Çindəki biznesidir. Tərəflər Çin əməliyyatlarını SpaceX-dən ayrı saxlayan model üzərində düşünürlər. Şanxaydakı zavod Tesla-nın ən böyük zavodudur və şirkətin avtomobillərinin yarısından çoxunu istehsal edir.

Musk birləşmə ideyasını ilk dəfə may ayında, SpaceX-in birjaya çıxmasından bir neçə həftə əvvəl səsləndirmişdi. Oktyabrda hər iki şirkətin direktorlar şurası bu məsələni qiymətləndirmək üçün xüsusi komitələr yaradıb. Bloomberg daha əvvəl şirkətlərin sazişi Donald Trump-ın prezidentlik müddəti bitməmiş bağlamaq istədiyini də yazıb. Tesla səhmdarlarının illik toplantısı isə dekabrın 3-də keçiriləcək.

Mənbə Bloomberg