Galaxy S27 seriyasının divar kağızları sızdı
Galaxy S27 seriyasının divar kağızları internetə sızıb. Beş rəngdə hazırlanan fon şəkilləri telefonların rəng seçimlərinə də işarə edir.
Samsung-un gələn il təqdim etməsi gözlənilən Galaxy S27 seriyasının divar kağızları internetə sızıb. Yeni sızmada beş statik fon şəkli yer alır. Onlar tünd qırmızı (burgundy), tünd göy, açıq mavi, ağ və çəhrayı rənglərdə hazırlanıb.
Divar kağızlarında lent kimi burulan "S" hərfi təsvir olunub. Galaxy S26 seriyasında bu forma daha açıq şəkildə S hərfinə bənzəyirdi, yeni dizayn isə daha yumşaq və axar görünüşə malikdir. Hesab olunur ki, S27 seriyası ilə statik fonlardan əlavə dinamik və canlı divar kağızları da gələcək.
Galaxy S27 hansı rənglərdə olacaq?
Samsung adətən divar kağızlarını telefonların rənglərinə uyğun hazırlayır. SammyGuru-nun təxmininə görə, tünd qırmızı və tünd göy rənglər Galaxy S27 Ultra və S27 Pro, daha açıq tonlar isə adi S27 və S27 Plus üçün nəzərdə tutula bilər. Bu hələlik təsdiqlənməyib.
İnsayder Ice Universe daha əvvəl Galaxy S27 Ultra-nın qara, mavi, açıq çəhrayı, ağ və xüsusi bənövşəyi rənglərdə olacağını iddia etmişdi. Bu rənglərin bir hissəsi divar kağızlarında görünür, qara isə hələ yoxdur. Tünd qırmızı rəng isə əvvəlki iddialarda yox idi. Samsung-un Galaxy S27 seriyasını 2027-ci ilin əvvəlində təqdim edəcəyi gözlənilir.
Mənbə SammyGuru
