Xiaomi şirkətinin hazırlıq mərhələsində olan smartfonlarının təqdimatdan həftələr, hətta aylar əvvəl sızdırılması bizim üçün adi hala çevrilib. Məsələn, keçən il Xiaomi 11 Ultra modelinin mühəndislik versiyası bir şəxsin əlinə keçmişdi və yüksək keyfiyyətdə videosunu hazırlayıb YouTube üzərindən paylaşmışdı. Şirkətin 2021-ci il üçün ən güclü smartfonu barədə bir çox detalı təqdimatdan təqribi 2 ay əvvəl öyrənə bilmişdik. Hətta öyrənmişdik demək doğru deyil, modellə hər tərəfli tanış olmuşduq. İndi isə, OnLeaks ləqəbli insayder tərəfindən Zouton resursu istinadən Xiaomi 12 Ultra modelinə aid olduğu iddia edilən render görüntüləri paylaşılıb. Paylaşılan render görüntüləri əslində o qədər təəccübləndirici olmayıb. İndiyə qədər ortaya çıxmış bir çox konsept render ilə bənzərliklər mövcuddur.
Sızdırılmış görüntülər inandırıcı olduğu qədər şübhəli də görünür
Paylaşılmış render görüntülərində ilk diqqət çəkən detal təbii ki, LEİCA yazısı olacaq. Xiaomi şirkətinin LEİCA ilə əməkdaşlığa başladığı məlumdur. Belə ki, kamera modulunun sağ aşağı hissəsində də bu LEİCA damğası qarşımıza çıxır. Kamera modulu həqiqətən çox böyük göstərilib və kənarlarındakı qara hissə Xiaomi 11 Ultra modeli ilə bənzərdir. İnsayder arxa tərəfdə 4 fərqli kamera sensoru təsvir edib ki, əsl qəribəlik də burda başlayır.
Qaynaq kodları və bəzi Çin mənşəli mənbələrin verdiyi məlumatlar smartfonda 3 kamera sensorunun olacağını ortaya qoymuşdu. Lakin təsvir edilmiş render görüntülərində 4 kamera sensoru mövcuddur. Bu hal şübhələri artırıb. Ona görə görüntülərin nə qədər doğru olduğu naməlumdur. Smartfonun ölçülərinə gəldikdə uzunluğu 161.9mm, eni 74.3mm, qalınlığı 9.5mm olaraq qeyd edilir. Çəkisi 234 qram olmalıdır.
Ekran ölçüsünün 6.6 düym olacağı bildirilib. Böyük bir ehtimalla bu ölçüdə də müəyyən yanlışlıqlar var. Düym olaraq ölçüsü 7 düymə yaxın olmalıdır. Selfi kamerası ekran altına yerləşdiriliməyib. Nəticədə deyə bilərik ki, paylaşılmış bu renderlər həqiqi cihaza yaxın ola bilər. Lakin reallıqda Xiaomi 12 Ultra modelinin daha yaxşı dizayna malik olacağını düşünürük. Smartfon qarşıdakı 2 ay ərzində təqdim ediləcək və Snapdragon 8+ Gen 1 çipsetindən güc alacaq. Yerdə qalan texniki xüsusiyyətləri isə tam olaraq məlum deyil.
