Apple şirkəti bu gün səhər məlumat verdiyimiz kimi 14 və 16 düymlük MacBook Pro seriyasını rəsmi olaraq təqdim etdi. Eyni zamanda yenilənmiş Mac mini modeli də MacBook modellərindən əlavə qarşımıza çıxarıldı. Lakin bu məhsullardan əlavə ən diqqət mərkəzində olan detal kompüterlərin sahib olduğu Apple M2 Pro və M2 Max prosessorları idi. Belə ki, gəlin Mac seriyasından əvvəl elə məhz M2 Pro və M2 Max prosessorları barədə məlumat verək. Hər bir prosessorun 2 fərqli variantı mövcuddur.
M2 Pro prosessoru 10 nüvəli CPU və 16 nüvəli bir GPU ilə təchiz edilib. Lakin əlavə bir 12 nüvəli CPU və 19 nüvəli GPU əldə etmiş daha güclü modifikasiyasını da əldə edə bilərsiniz.
M2 Max prosessoru isə 12 nüvəli CPU və 30 nüvəli bir GPU əldə edib. Alternativ olaraq daha güclü CPU nüvələrinin sayı sabit qalmaqla, 38 nüvəli GPU ilə gücləndirən variantı da təqdim edilir.
Apple M2 Pro
Apple M2 Pro prosessoru TSMC-nin 5nm texnoloji prosesi ilə hazırlanır və M1 Pro ilə müqayisədə 20% daha çox tranzistora malikdir. Deyəcəksiniz ki, əvvəlki nəsil də 5nm texnoloji prosesə sahib idi. Lakin qeyd etmək lazımdır ki, yeni nəsil Mac modellərində olan M2 Pro prosessoru ikinci nəsil 5nm istehsal prosesi ilə hazırlanır. Nəticədə tranzistor sayı 40 milyardı keçib. CPU performansı sələfi ilə müqayisədə 20% artarkən, GPU performansı 30% artıb. 10 nüvəli variantında 6 performans, 4 enerji səmərəli nüvə konfiqurasiyası varkən, 12 nüvəli variantında 8 performans, 4 enerji səmərəli nüvə işlədilib. Bu prosessor eyni zamanda 200GB/s band genişliyinə malik 32GB LPDDR5 operativ yaddaş dəstəyi ilə gəlir.
Apple M2 Max
Mac modellərindəki ən güclü M2 prosessoru olan M2 Max, tam olaraq 67 milyard tranzistora sahibdir. CPU performansı sələfi ilə müqayisədə 20% artarkən, GPU performansı 30% artıb. 12 nüvədən 8 ədədi performans, 4 ədədi enerji səmərəli nüvədir. Bu prosessor isə 400GB/s band genişliyinə malik 96GB LPDDR5 operativ yaddaş dəstəyi ilə gəlir.
Hər iki prosessor əvvəlki nəsil prosessorlardan 40% daha güclü 16 nüvəli 15,8TOPS emal gücünə sahib neyron mühərriki alıb. ProRes mühərrikləri ilə təchiz edilmiş prosessorlar ProRes, HEVC, H.264 formatında videoları 8K təsvir ölçüsündə belə işləyə bilər.
Mac seriyasının yeni MacBook Pro seriyası notbukları M2 seriyası prosessorlarla nə gətirir?
MacBook Pro seriyasında ən maraqlı detal M2 seriyası prosessorların ekran müddətinin əhəmiyyətli dərəcədə artırmasıdır. Belə ki, Apple tərəfindən verilən məlumata əsasən, bu cihazlarla yüngül işlərdə 16 düymlük modeldə 22 saata qədər ekran müddəti almaq mümkündür. Liquid Retina XDR ekran əldə etmiş notbuklar eyni zamanda 8K keyfiyyətdə 60Hz ekrana, o cümlədən 4K keyfiyyətdə 240Hz ekrana görüntü ötürə bilərlər. Touch ID dəstəkli və işıqlandırmalı Magic Keyboard, 3 ədəd Thunderbolt 4 portu, HDMI portu, SD kart yuvası, 3.5 mm qulaqlıq yuvası, şarj etmək üçün MagSafe 3, 1080p FaceTime HD kamera və 6 dinamikli səs ucaldanlar yeni MacBook Pro modellərinin hər birində mövcuddur. Qeyd edək ki, seçdiyiniz variantdan asılı olaraq yaddaş həcmini maksimum 8TB-a qədər artıra bilərsiniz.
Mac Mini modeli isə xüsusilə M2 və M2 Pro prosessorları ilə gəlməsi ilə fərqlənir. Köhnə Intel variantının istehsalı dayandırıldığı üçün, Apple məhsulları arasında yalnız Mac Pro kompüteri Intel prosessoru ilə qalmış olacaq. Ehtimallara görə Mac Pro modeli də bu ilin sonu fantastik xüsusiyyətlərə malik M2 Ultra ilə birlikdə yenilənəcək.
Kompüterlərin qiyməti (Amerika)
MacBook Pro 14 düymlük variantı 1999$, 16 düymlük variantı isə 2499$ başlanğıc qiymət ilə təklif edilir. Mac Mini modeli isə 599$ başlanğıc qiymətinə sahibdir. Təbii ki, qiymətlər modifikasiyaya və ölkəyə görə olduqca fərqli olacaq.
