Apple ekosisteminə daxil ediləcək ən yeni məhsul şirkətin CEO-su Tim Cook-un böyük əhəmiyyət verdiyi Apple Vision Pro oldu. VR sektorunu kökündən silkələyən qarışıq reallıq eynəyi təkcə Apple üçün deyil, həm də bütün AR/VR bazarı üçün böyük əhəmiyyət kəsb edən model kimi çıxış etdi. Texnologiya dünyasında iPhone effekti yaratması gözlənilən məhsul, şirkətin illərdir təkmilləşdirdiyi texniki və proqram infrastrukturu üzərində qurulub. Vision Pro, dizayn baxımından ilk dəfə baxdığımızda gözləniləndən xeyli zərif təəssürat bağışlayır.
Vision Pro ilk növbədə AR cihazı kimi hazırlanıb, lakin sahib olduğu texniki imkanlar hesabına tam virtual reallıq arasında keçid edə bilir. Vision Pro ilə bağlı açıqca demək mümkündür ki, istifadəçinin ehtiyacı olan tək şey otaqdır. Çünki, idarə etmək üçün sadəcə əlləriniz, gözləriniz və ya danışmağınız kifayətdir.
Məsələn, insanlarla uzaqdan danışarkən məkanda canlı hissiyat yaradacaq şəkildə FaceTime reallıq eynəyində əks oluna bilir. Artırılmış reallıq özlüyündə, ətrafınızdakı real insanlardan da təcrid olmamağa imkan verir. Eynək EyeSight adlı sistemlə gözlərinizə nəzarət edir və əgər siz tam VR rejimindəsinizsə, ekran gözlərinizi gizlədəcək və əlçatan olmadığınızı, yəni onları görmədiyinizi qarşıya bildirəcək.
Apple deyir ki, kamera əlavə dərinlik məlumatları ilə xüsusi anları çəkmək üçün də istifadə oluna bilər. Yəni, əslində bu alət sahib olduğu çox güclü texniki imkanlar hesabına adətən yaşadığınız anı gələcəyıə daşımaq üçün üç ölçülü videolar qeydə almağı mümkün edir. Bu isə, adətən keçmişi video ilə “canlı-canlı” yaşamaq deməkdir. Vision Pro Arcade kitabxanasındakı 100-dən çox müxtəlif oyunu dəstəkləyir və sistem zərurət yaranarsa PS5 və ya Xbox nəzarətçisi ilə də birləşdirilə bilər.
Eynəyin bütün ön hissəsi yüngül alüminium çərçivə ilə bəzədilmiş şüşədən hazırlanmışdır. Cihazın içərisinə 5 sensor, 12 kamera, ekran və fan ilə soyudulması həyata keçirilən prosessor daxildir. Yuxarı hissəsində düymə və Digital Crown adlandırılan bir element mövcuddur. Optimal dərinlik üçün modul sistemi olan Vision Pro, yanlarında audiopodlar yerləşdirir. Eynəyin batareyası ayrıdır və maqnit ilə eynəyin yan tərəfinə yapışdırılır.
Vision Pro, microOLED ekran panelinə malikdir və hər paneldə 23 milyon pikselə malikdir. Bu, tam olaraq 4K təsvir ölçüsündə görüntülər yaratması deməkdir. Vision Pro, həmçinin Spatial Audio sisteminə də malikdir. Vision Pro səs qaynağının izlənilməsi funksiyasından istifadə edərək səsi ətraf mühitə uyğunlaşdıra bilər. Obyektivlər isə birbaşa ZEISS imzası daşıyır. Cihaz real vaxt rejimində sensorların emalına həsr olunmuş yeni “R1” çipi ilə birləşdirilmiş M2 prosessoru ilə işləyir. “R1” prosessorunu yaxşı yadda saxlayın, çünki gələcəkdə Apple Car üçün vacib rol oynaya bilər. Belə ki, “R1” prosessoru real zaman kəsiyində kamera və sensorlardan gələn görüntü məlumatlarını 12ms ərzində işləyir və ehtimallara görə bu qədər kamera və sensor məlumatlarını işləmə potensialında olan “Apple R” seriyası elektromobilin xəbərçisi kimi qiymətləndirilir.
iPhone və iPad proqramları cihaz işə salındıqdan sonra birdən çox funksionallıq üçün visionOS-da işləyə biləcək. Uyğun iPhone və iPad proqramlarını, eləcə də visionOS üçün hazırlanmış proqramları tapmaq üçün tamamilə yeni App Store mövcud olacaq. Təhlükəsizlik tərəfində, Vision Pro Optic ID xüsusiyyətinə sahib olacaq. Adından da göründüyü kimi, cihaz şəbəkəyə qoşulduqda öz istifadəçisini iris skan etməklə tanıyacaq. Xatırladaq ki, cihazla bağlı 5000 fərqli patent alınıb.
Apple Vision Pro-nun qiyməti 3499 dollar olaraq açıqlandı. Vision Pro gələn ilin əvvəlindən əlçatan olacaq. Təəssüf ki, Vision Pro yalnız ABŞ-da Apple pərakəndə satış mağazalarında satışa çıxarılacaq.
