Avtomobil sahəsindəki texnologiya inkişaf etdikcə yeni təhlükələr və problemlər ortaya çıxır. Bunlardan biri də məhz tam avtonom sürüş texnologiyasıdır. Çin tam avtonom sürüş texnologiyasına sahib avtomobillərin qara qutu ilə təchiz edilməsini məcburi etməyi planlayır. Avtomobillərin avtopilot rejimində qəza törətməsi halları çoxaldığından Çin belə bir çıxış yolu tapıb. Belə ki, avtomobilə quraşdırılan qara qutu qəzadan əvvəl avtomobilin hansı rejimdə olduğunu, qəzanın hansı səbəbdən baş verdiyini qeyd edə biləcək. Əgər avtomobil avtopilot rejimində olarsa sürücü cəza almaya bilər. Əsasən hava nəqliyyat vasitələrinə quraşdırılan qara qutu sürcülərin məhkəmədə cəzalandırılmasının da qarşısını ala bilər.
Çin Sənaye və İnformasiya Texnologiyaları Nazirliyi bildirir ki, artıq Çindəki nəqliyyat vasitələrinə qara qutu quraşdırılması üçün hazırlıq prosesi görülür. Yeni layihəyə görə avtomobil tam avtonom rejimdə və ya sürücünün idarəsində olduğunda məlumatlar toplayacaq. Maraqlısı budur ki, qara qutuda toplanan məlumatların yalnız Çində istifadə edilməsi nəzərdə tutulur. Yəni məlumatlar heç bir halda kənara çıxarıla bilməz. Avtomobil brendləri Çinin bu tələbi ilə razılaşır. Layihənin digər maraqlı tərəfi odur ki, avtomobillərə quraşdırılan kameralar qeydə aldıqları videoları daim qara qutuya ötürəcək. Bu da yol nəqliyyat hadisəsi zamanı hadisənin virtual olaraq yenidən dizayn edilməsinə və dəyərləndirilməsinə imkan verəcək.
Çin avtomobillərə qara qutu quraşdırmaq layihəsindən əlavə olaraq, ucqar rayonlarda elektrik şarj stansiyaları şəbəkəsini genişləndirməyi planlaşdırır. Çinin yeni planlarına əsasən deyə bilərik ki, Çin artıq tamamilə elektrikli avtomobillərə keçid etməyə hazırlaşır. Əslində hal-hazırda dünyada mövcud olan elektrikli avtomobillərin əksəriyyəti ya Çin brendinə məxsusdur ya da Çin ehtiyat hissələrindən istifadə edir. Elektromobillər üzərində ixtisaslaşan Tesla brendi belə Çinli brend tərəfindən istehsal olunan batareyalardan istifadə edir.
