Samsung şirkətinin çipset və yarımkeçirici istehsalında yaşadığı problemlər həm istehsalçını, həm alıcıları çətin vəziyyətə salır. Ötən il Samsung Galaxy S21 seriyasında Exynos 2100 çipseti Snapdragon 888 çipseti ilə olan fərqi qapatmışdı. Lakin bu il çıxarılmış Exynos 2200 çipseti yenə Snapdragon 8 Gen 1 ilə balansı müəyyən qədər itirdi. Snapdragon 8+ Gen 1 isə ümumiyyətlə istehsal prosesinin Samsung şirkətindən alınması ilə nəticələndi. Bilməyənlər üçün qeyd edək ki, Snapdragon 8 Gen 1 çipseti Samsung-un 4nm texnoloji prosesi ilə istehsal olunurdu. Lakin Snapdragon 8+ Gen 1 çipseti illər əvvəl olduğu kimi TSMC-ə geri qaytarıldı. İndi isə Qualcomm şirkəti Snapdragon 8 Gen 2 ilə tamamilə TSMC-nin effektivliyi üzərinə yeni arxitektura inkişaf etdirir. Bu da Exynos 2300 çipsetinin Snapdragon 8 Gen 2 ilə rəqabətə davam gətirməyəcəyi mənası daşıyır.
Smartfonlara Exynos 2300 quraşdırılarsa, Snapdragon 8 Gen 2 ilə rəqabətə davam gətirməyəcək
Samsung şirkəti yeni arxitekturalı və TSMC istehsal prosesinə sahib SD 8 Gen 2 çipsetindən narahatdır. Çünki, Qualcomm və TSMC bir yerə gəldikdə əksərən avtomatik olaraq güclü, enerji sərfiyyatı az, isinmə problemləri minimum olan çipset ortaya çıxır. Nəticədə Exynos 2300 ikili çipset strategiyası üçün əhəmiyyətli problemlər yarada bilər.
Hal-hazırda Samsung Galaxy S22 seriyasının 70%-lik hissəsi Qualcomm Snapdragon 8 gen 1 platforması üzərinə qurulub. Analitik Ming-Chi Kuo tərəfindən verilən məlumata görə yaxınlaşan Galaxy S23 seriyasında bu rəqəm 100%-ə qədər yaxınlaşacaq.
Analitikin dediyinə görə Samsung şirkətinin Exynos 2300 çipseti Samsung-un 4nm istehsal prosesi ilə hazırlayıb. İlk problem burdan qaynaqlanır, çünki Samsung ən azından 3nm istehsal prosesinə keçməlidir. Əks halda TSMC-nin 4nm texnoloji prosesi ilə balansı qorumaq mümkün deyil. Ona görə də Samsung Galaxy S23 seriyasında şirkət müəyyən istisnalar xaricində tamamilə SM8550 platformasına yönələcək.
İstisna isə Apple firmasının bu il tətbiq edəcəyi “Pro” modellərə yeni çipset quraşdırmaq, sadə modellərə isə keçən il hazırlanan çipseti quraşdırmaq strategiyasına bənzəyir. Yəni sadə Galaxy S23 modeli Exynos 2300 ilə çıxarılarkən, seriyanın digər modelləri SD 8 Gen 2 və ya digər adı ilə SM8550 platformasını alacaq. Siz bu mövzu ilə bağlı nələr düşünürsünüz? Fikirlərinizi rəylərdə bizimlə bölüşə bilərsiniz.
