Vəziyyət elə bir həddə çatıb ki, artıq Twitter deyəndə ağlımıza ilk Elon Musk gəlir. Twitter-i almaq cəhdində məhkəməlik olan Musk indi isə elə bir paylaşım etdi ki, onun öz sosial media platformasını qura biləcəyini düşünməyə başladıq. Tesla hissələrinin 7 milyard dollarlıq qismini satdıqdan sonra belə paylaşım etməsi olduqca diqqət çəkir. Belə ki, bir istifadəçi Musk-a “Twitter sövdələşməsi baş tutmasa, öz sosial platformanızı yaratmağı düşünmüsünüzmü?” sualını ünvanlayıb. İş adamı isə bu suala qısaca “X.com” cavabını verib.
X.com-un hekayəsi keçmişə dayanır
Bu domen 1999-cu ildə Harris Fricker, Christopher Payne və Ed Ho ilə birlikdə onlayn bank olaraq Musk tərəfindən yaradılmışdır. Üstəlik, Musk “x.com” domen adını 2017-ci ildə PayPal-dan geri alıb. PayPal-dan ayrıldıqdan sonra şirkət daxilində qalan bu domeni 2017-ci ildə aldığı zaman bu sözləri demişdi:
“X.com-u geri almağa icazə verdiyiniz üçün PayPal-a təşəkkür edirəm! Hazırda planım yoxdur, amma mənim üçün böyük mənəvi dəyəri var”.
7 milyardlıq Tesla hissəsini sosial media qurmaq üçün satdı?
7 milyard dollar dəyərində Tesla hissəsi satılanda bunun məhz Twitter-i almaq üçün atılan bir addım olduğunu təxmin edirdik. Lakin bu paylaşım şübhələrə səbəb oldu. Yəni iş adamı öz sosial mediasını qurmaq üçün hissələri satmış ola bilər. Özündən bununla bağlı dəqiq bir açıqlama gəlməsə də önümüzdəki günlərdə X.com mediasının yenidən gündəmə gələcəyini deyə bilərik.
Hazırda X.com-da nə var?
X.com yazıb axtarış etdikdə qarşımıza çıxan tək şey “X” hərfidir. İnspect hissəsinə göz atıb bəlkə oradan ip ucular ala biləcəyimi düşünərək kodlara nəzər salsam da diqqət çəkən nəsə görmədim. Sadəcə body tagları arasında yazılmış X hərfindən başqa heçnə gözə dəymir. Saytın domen adı məlumatında da heç bir informasiya yoxdur. Sadəcə domen adının GoDaddy tərəfindən qeydiyyata alındığı bilinir.
Bəs siz bu mövzu haqqında nə düşünürsünüz. Sizcə Musk Twitter-i almaq yerinə öz sosial mediasını quracaq?
Elon Musk-ın Twitter-i almaqdan imtina etdiyi vaxtda baş verənlər barədə yazılmış xəbərimizi də oxumaq üçün linkə keçid edə bilərsiniz.
