YouTube 2027-ci ildə yeni video formatına keçir: Görüntü keyfiyyəti artacaq

YouTube 2027-ci ildən etibarən videoların yayımlanmasında yeni AV2 kodekindən istifadə etməyə başlayacaq. Şirkətin məlumatına görə, yeni texnologiya daha az internet trafiki sərf etməklə yüksək görüntü keyfiyyəti təqdim etməyə imkan verəcək.

AV2 hazırda geniş istifadə olunan AV1 standartının təkmilləşdirilmiş versiyasıdır. Yeni kodekin AV1 ilə müqayisədə təxminən 30 faiz daha səmərəli sıxılma təmin etdiyi bildirilir. Bu isə eyni keyfiyyətdə videonun daha az məlumat ötürülməsi ilə yayımlanması deməkdir.

Başqa sözlə, istifadəçilər internet bağlantısının sürəti dəyişmədən daha keyfiyyətli videolara baxa biləcəklər. Eyni zamanda, daha zəif internet bağlantılarında videoların donması və yüklənmə müddətinin uzanması kimi problemlərin azalması gözlənilir.

FlatpanelsHD-nin məlumatına görə, YouTube AV2 formatını 2027-ci ilin əvvəlindən tətbiq etməyi planlaşdırır. Şirkətin mühəndislik direktoru Des Kin (Des Keane) bildirib ki, əsas məqsəd videoları mümkün qədər az fasilə ilə və yüksək keyfiyyətdə təqdim etməkdir.

Onun sözlərinə görə, 19 mart 2026-cı il tarixinə YouTube-un video kataloqunun 90 faizindən çoxu artıq AV1 formatında təqdim olunurdu. AV2-yə keçid isə həm görüntü keyfiyyətini yaxşılaşdıracaq, həm də yeni video funksiyalarının tətbiqinə imkan yaradacaq.

Yeni kodekin üstünlükləri yalnız adi video izləməklə məhdudlaşmır. Chrome-un mühəndislik üzrə vitse-prezidenti Cim Bankoski (Jim Bankoski) bildirib ki, AV2 brauzerlərdə eyni anda bir neçə videonun göstərilməsi və daha yüksək keyfiyyətli videozənglər üçün də yeni imkanlar yarada bilər.

Bununla belə, AV2-nin geniş yayılması cihazların texniki dəstəyindən asılı olacaq. Xüsusilə smartfonlarda yeni formatın enerji sərfiyyatına təsiri və videoların axıcı göstərilməsi üçün prosessor və qrafik çiplərində aparat səviyyəsində dəstək mühüm əhəmiyyət daşıyır.

Hazırda AOMedia istehlakçı cihazları üçün AV2 dəstəyinin nə vaxt geniş istifadəyə veriləcəyi barədə konkret tarix açıqlamayıb.

YouTube-un 2027-ci il planı ilkin mərhələdə veb-brauzerlər üzərindən video yayımını əhatə edir. Mobil tətbiqlərdə və smart televizorlarda AV2 formatının nə vaxt istifadəyə veriləcəyi isə hələlik məlum deyil.

Beləliklə, yeni kodek YouTube-da həm görüntü keyfiyyətini artırmaq, həm də internet trafikindən daha səmərəli istifadə etmək baxımından mühüm yenilik ola bilər. Lakin istifadəçilərin bu üstünlüklərdən tam yararlanması AV2-ni dəstəkləyən cihaz və proqram təminatının yayılmasından asılı olacaq.