ABŞ-ın texnologiya nəhəngi Google bu il Pixel 8 seriyası telefonlarını bizə təqdim edəcək. Bəzi şayiələrə görə Pixel 8 və Pixel 8 Pro modelindən ibarət olacağı gözlənilən telefon xətti olduqca iddialı xüsusiyyətlərə sahib olacaq. Belə ki, seriyanın ən güclü üzvü Pixel 8 Pro və Pixel 8 üçün dizaynın necə olacağını göstərən görüntülər ortaya çıxdı.
Telefonun yenidən dizayn edilmiş korpusa və daha yuvarlaq künclərə sahib olduğu açıqca görünür. Bundan əlavə, ən çox nəzərə çarpan dəyişikliyin arxa kamera hissəsində olduğunu görürük. Gördüyünüz kimi gövdədə əvvəlki Pixel seriyasından əsər-əlamət qalmayıb. Pixel 8 Pro ilə tamamilə arxadan önə doğru “yuvarlanan” dizayn konsepti təyin edilib. Əslinə qalsa çox erqonomik və biraz da futuristik hissiyat yaşadan, fikrimcə favoritlərim arasına daxil olacaq dizayn alıb. Ekranın kənar çərçivələri minimum səviyyədə incəldilib. Çənə qismi isə qane edici səviyyədə qalındır, lakin indiyə qədər gördüyüm renderlərə istinadən, real həyatda daha da ideal səviyyədə olacağından ekran çox mükəmməl hissiyat yaradacaq. Bu hissədə kameralar tək oval sahəyə yerləşdirilir. Pixel 7 Pro modelin də arxa kameraların ayrıca yerləşdirildiyini görmüşdük. Pixel 8 Pro arxasında üçlü kamera quruluşuna əlavə olaraq, flaşın altında daha bir LIDAR-a bənzər sensor ola biləcəyi diqqətdən qaçmır. Hazırda bu sensorun nə olacağı barədə dəqiq məlumat yoxdur.
Əlavə edək ki, telefonun 6,52 düymlük ekrana sahib olacağı gözlənilir. Bu gün sizlərə Exynos 2300 çipseti barədə də xəbər vermişdik və Pixel 8 Pro modeli üçün hazırlanmış “Tensor G3”-ün əslində elə Exynos 2300 ilə uyğun ola biləcəyi ehtimalından danışmışdıq ki, konsepti yayımlayan “onleaks” də bənzər bir detalı dilə gətirib. Həmin xəbər istinadən Exynos 2300 çipseti barədə detalları isə rəylərdən saytımıza keçərək oxuya bilərsiniz. Eyni zamanda əvvəlki nəsillərlə müqayisədə əvvəlki kamerada ciddi təkmilləşdirmələr olacağı bildirilir. Pixel 8 seriyasının təqdimat tarixi hələ rəsmi olaraq açıqlanmayıb. Google bu yaxınlarda bu ilki I/O tədbirinin mayın 10-da keçiriləcəyini söyləmişdi. Buna görədə bu telefonların bu tədbirdə tanıdılacağı iddia olunur.
Son olaraq diqqət çəkən digər bir model də Pixel 8 modelidir ki, Google şirkəti bu modelinin ölçüsünü isə əhəmiyyətli dərəcədə kiçildir. Belə ki, insayderin verdiyi məlumata görə Google Pixel 8 modeli tam olaraq 5.8 düymlük ekran paneli əldə edəcək. Əvvəlki 6.3 və 6.4 düymlük Pixel 6 və Pixel 7 seriyası ilə müqayisədə yenilənmiş model xüsusilə minimal ekran çərçivələri, müasir görünüşü ilə də ön planda olacaq.
