Qlobal bazarda öz sözünü deməyi bacaran və smartfon bazarında gün keçdikcə dəyər qazanan HONOR brendi ölkəmizdə daha bir modelini satışa çıxarıb. Belə ki, söhbət HONOR 200 seriyasının ölkəmizdə yeni satışa çıxarılan 200 Lite modelindən gedir. Bu günkü icmalımızın qonağı məhz büdcəyönümlü yeni 200 Lite modelidir. HONOR brendi bu modeldə təkmilləşdirilmiş performans və cəlbedici foto çəkiliş imkanları, eləcə də göz oxşayan dizayn təklif edir.
HONOR 200 Lite hansı xüsusiyyətlərə sahibdir?
Gəlin ilk öncə smartfonun ekran xüsusiyyətlərinə nəzər salaq. Orta səviyyəli bu smartfon 6.7 düymlük FHD+(1080×2412 piksel) təsvir ölçüsü və 341 ppi piksel sıxlığı təmin edən AMOLED ekran paneli ilə təchiz edilib. Qeyd edək ki, smartfonun ekran gövdə nisbəti 89.9% təşkil edir və ölçüləri 161.1 x 74.6 x 6.8 mm-ə bərabərdir. Habelə, ekran 20:9 aspekt nisbətinə sahibdir və HDR10+ məzmunun göstərilməsini dəstəkləyir. Qlobal bazarda təqdim edildikdə bütün diqqətləri cəlb etməyi bacaran smartfonun ağırlığı isə 166 qram təşkil edir. Təhlükəsizlik tərəfində isə smartfonun yan tərəfində 1 ədəd barmaq izi sensoru yer alır və smartfon 2D Üz Tanıması dəstəkləyir.
Ümumiyyətlə 200 Lite modelində istifadə olunan ekran öz sinfinin ən yaxşısı hesab olunur və olduqca yüksək keyfiyyət təmin edir. 2000 nit maksimal parlaqlığa və 90 Hz yenilənmə tezliyinə, 3240 Hz yüksək tezlikli PWM qaralma əmsalına sahib olan ekran həmçinin rəqibləri arasında seçilir. Smartfon incə yə yüngül olmasına baxmayaraq yüksək davamlılığa sahibdir və hətta 1.65 metr hündürlükdə düşmələrə belə tab gətirə bilir. Həmçinin smartfon SGS Beş Ulduzlu Düşməyə Müqavimət Sertifikatına sahibdir. AMOLED displeylər əsasən dolğun qara rənglər, əla baxış bucaqları və zəngin rəng çalarları ilə tanınır. Xüsusilə yüksək oyun təcrübəsi yaşamaq istəyənlər üçün bu ekranlar ideal seçim hesab olunur.
Əlavə olaraq qeyd edək ki, smartfon öz gücünü MediaTek Dimensity 6080 çipsetindən alır ki, bu çipset 2,4 GHz-ə qədər tezliyə malik iki Cortex-A76 nüvəsi, 2,0 GHz-ə qədər tezliyə malik altı Cortex-A55 nüvəsi və Mali-G57 MC2 qrafik nüvəsinə sahibdir. Bu səkkiz-nüvəli prosessor gündəlik istifadənin öhdəsindən asanlıqla gəlməklə yanaşı, istifadəçilərə sosial mediada və internetdə rahatlıqla vaxt keçirməyə və eyni anda birdən çox proqramı istifadə etməyə imkan verir. Smartfon orta səviyyəli sinif üçün ideal hesab olunan 8GB RAM və 256GB yaddaş təklif edir. Onu da qeyd edək ki, məşhur AnTuTu platformasında bu çipset 448.036 xal əldə edir ki, bu da mövcud cihazların 75%-dən daha üstün nəticədir.
HONOR 200 Lite kamera xüsusiyyətləri
Mat örtüklü arxa paneldə üçlü kamera modulu yerləşdirilmişdir. Onlardan ikisi alt-alta digəri isə onlara paralel olaraq simmetrik şəkildə yerləşib. OIS dəstəkli bu kamera sensorları müvafiq olaraq 108 MP f/1.75, geniş bucaqlı əsas, 5 MP f/2.2, ultra geniş bucaqlı və son olaraq 2 MP f/2.4, makro kamera sensorlarıdır. Kamera modulunda həmçinin 1 ədəd LED flaş da yer alır. Ön tərəfdə isə ekran panelinə quraşdırılmış 50MP f/2.1 selfi kamerası yer alır. Qeyd edək ki, OIS dəstəkli bu kamera sensorları ilə 1080p keyfiyyətdə 30 fps FHD video çəkmək mümkündür.
Yeni büdcəyönümlü cihaz HONOR şirkətinin özünəməxsus Magic Capsule, Magic Portal və Parallel Space funksiyalarını dəstəkləyən Android 14 əsasında işləyən, MagicOS 8.0 əməliyyat sistemi ilə təchiz edilmişdir. Bununla da deyə bilərik ki, yeni smartfon HONOR-un özünəməxsus süni intellekt funksiyaları və xüsusiyyətləri ilə olduqca yeni istifadəçi təcrübəsi təklif edir.
Batareya tərəfində HONOR 200 Lite modeli 35 Vt şarj sürətini dəstəkləyən 4500 mAs həcmli batareya ilə təchiz edilib. Bundan əlavə, smartfon 4G, 5G, VoLTE, Bluetooth v5.1, WiFi, NFC kimi xüsusiyyətlərə sahibdir. Habelə smartfon USB-C v2.0 portuna sahib olub ki, bu da istifadəçilərə daha təhlükəsiz və daha sürətli şarj imkanı təklif edir. Onu da qeyd edək ki, smartfon rəsmi suya davamlılıq sertifikatına sahib deyil. Smartfon hazırda ölkəmizdə Ulduzlu Göy,Mavi Göl,Gecəyarısı Qara rənglərində təklif olunur.
Ümumi olaraq isə, yeni smartfon qiymət və preformans nisbətinin əla təcəssümüdür və hər kəsə istifadəçi təcrübəsi təmin edəcək. Kamera və ekran keyfiyyəti tərəfində hazırda bazarda olan bir çox smartfondan daha üstün alan bu cihazı əldə etmək sizi məmnun edəcək. Lakin yenə də smartfonu əldə edərkən onun əlavə MicroSD yaddaş kartı dəstəkləmədiyini və suya davamlı olmadığını nəzərə almağınız lazımdır. Qeyd edək ki, smartfon hazırda rəsmi mağazalarda 649.99 manata təklif olunur.
