Apple iPhone 20-də Action Button düyməsindən imtina edə bilər

Apple 2027-ci ildə iPhone-un 20 illiyinə həsr olunmuş xüsusi smartfon modelini təqdim etməyə hazırlaşır. İlkin məlumatlara görə, iPhone 20 adlandırılması gözlənilən cihaz dizayn baxımından ciddi dəyişikliklərlə seçiləcək. Şirkətin fiziki düymələrin sayını azaltmağı və Action Button funksiyasını Kamera İdarəetmə düyməsi ilə birləşdirməyi planlaşdırdığı iddia olunur.

Çinli mənbənin yaydığı məlumata əsasən, Apple iPhone 20 modelində ayrıca Action Button düyməsini tamamilə aradan qaldıra bilər. Onun funksiyalarının isə hazırda iPhone modellərində istifadə olunan Camera Control düyməsinə inteqrasiya edilməsi nəzərdən keçirilir.

Yeni sistemdə Kamera İdarəetmə düyməsinə bir dəfə basmaqla kamera tətbiqini açmaq, düyməni basılı saxlamaqla isə istifadəçinin əvvəlcədən təyin etdiyi funksiyanı aktivləşdirmək mümkün olacaq. Beləliklə, iki ayrı düymənin funksiyaları bir idarəetmə elementində birləşdiriləcək.

Bu dəyişiklik Apple-a smartfonun yan çərçivəsində əlavə yer qazanmağa və daha minimalist dizayn yaratmağa imkan verə bilər.

Sızdırılan məlumatlara görə, şirkət digər fiziki düymələrin konstruksiyasını da dəyişdirməyi planlaşdırır. iPhone 20-də enerji, səs səviyyəsinin idarə edilməsi və kamera düymələrinin mexaniki hərəkət edən ənənəvi quruluş əvəzinə bərk cisim texnologiyasına (solid-state) əsaslanacağı bildirilir.

Bu texnologiyada düymələr fiziki olaraq hərəkət etmir. İstifadəçi düyməyə toxunduqda və ya təzyiq göstərdikdə cihazın daxilindəki xüsusi mexanizm titrəyiş yaradaraq basılma hissini imitasiya edir. Beləliklə, düymələr smartfonun çərçivəsindən kənara çıxmadan onun səthi ilə eyni səviyyədə yerləşdirilə bilər.

Apple-ın yeni modeldə ekran dizaynını da əhəmiyyətli dərəcədə dəyişəcəyi gözlənilir. İddialara görə, iPhone 20-nin ekranı dörd tərəfdən əyilərək cihazın yan hissələrinə qədər uzanacaq. Bu yanaşma ekranla korpus arasında daha bütöv görünüş yaradacaq və smartfonun ön hissəsinin demək olar ki, tamamilə ekrandan ibarət olmasına imkan verəcək.

Bununla belə, Bloomberg-in tanınmış texnologiya jurnalisti Mark Qurman daha əvvəl belə dizaynın istehsal baxımından ciddi çətinliklər yaratdığını bildirmişdi. Dörd tərəfi əyri şüşə konstruksiyasının hazırlanması istehsal xərclərini artıra və nəticədə smartfonun satış qiymətinə təsir göstərə bilər.

iPhone 20 ilə bağlı yayılan digər məlumatlar cihazın kamera və batareya sistemində də mühüm yeniliklərin ola biləcəyini göstərir.

İddialara əsasən, Apple yeni modeldə LOFIC texnologiyasına malik kamera sensorundan istifadə edə bilər. Bu texnologiya yüksək kontrastlı səhnələrdə işıqlı və qaranlıq sahələrin detallarını daha yaxşı qorumağa, kameranın dinamik diapazonunu genişləndirməyə imkan verir.

Smartfonun daha böyük ekranla və indiyədək iPhone modellərində istifadə olunan ən yüksək tutumlu batareyalardan biri ilə təchiz ediləcəyi də bildirilir.

Məlumata görə, Apple silikon-karbon batareya texnologiyasına keçid etməklə iPhone 20-nin batareya tutumunu 6000 mAh səviyyəsinə çatdıra bilər. Bu texnologiya batareyanın ölçülərini əhəmiyyətli dərəcədə artırmadan daha çox enerji saxlamağa imkan verə bilər.

Qeyd edək ki, Apple-ın mexaniki olmayan düymələr üzərində çalışması yeni məsələ deyil. Şirkətin bu texnologiyanı daha əvvəl iPhone 15 Pro modelində tətbiq etməyi planlaşdırdığı, lakin Bongo kod adlı layihə çərçivəsində texniki problemlərlə qarşılaşdığı bildirilmişdi.

Son məlumatlara görə, həmin problemlərin aradan qaldırıldığı və yeni düymələrin funksional sınaq mərhələsini tamamladığı iddia edilir. Apple-ın texnologiyanı 2027-ci ildə təqdim olunacaq model üçün kütləvi istehsala hazırladığı bildirilir.

Bununla belə, iPhone 20-nin dizaynı, texniki xüsusiyyətləri və yeni idarəetmə sistemi haqqında yayılan məlumatlar hələlik qeyri-rəsmi mənbələrə əsaslanır. Apple bu yeniliklərin heç birini rəsmi şəkildə təsdiqləməyib.