Daha bir Azərbaycan startapı 500 Global (Startups) Akselerasiya proqramına qəbul edildi. Beləliklə, təsisçisi Emin Əliyev olan Murmur startapı 500 Global proqramına qəbul edildiyini açıqlayıb. Murmur layihəsi bel çantalarında smart LCD ekran daşıyan və küçələrdə gəzintiyə, reklamlara görə pul alan piyadalar şəbəkəsi yaradır. Startap, fərdiləşdirilmiş açıq reklamları göstərən və brendlər üçün reklam analitikasını təqdim edən innovativ media növüdür.
Murmur startapının əsas məqsədi bel çantalarının üzərinə yerləşdirilən ekranlarla reklamı mobilləşdirməkdir. Startap bel çantasından yararlanaraq bir xərc olmadan mağazada, avtobusda, küçədə, universitetdə, bir şəxsin ola biləcəyi hər yerdə reklam verməyi təmin edir. Emin Əliyev tərəfindən San-Fransisko və Çikaqoda yaradılan startap hal-hazırda innovativ reklam platforması kimi ölkəmizdə də fəaliyyət göstərir. Qeyd etmək lazımdır ki, həmyerlimiz Emin Əliyev Easymove platformasının “exit” etməsindən əldə edilən məbləği Murmur startapının inkişafına yönəltmişdir
Bundan əvvəlki xəbərlərimizdə Voiceloft, Glorri kimi bir neçə Azərbaycan startaplarının 500 Global (Startups) Akselerasiya proqramına qəbul aldığını sizinlə bölüşdük. Murmur startapının da 2010-cu ildə Dave McClure və Christine Tsai tərəfindən əsası qoyulmuş 500 Global Akselerasiya proqramına qəbul alması sevindirici xəbərdir.
