Android yeni xüsusiyyəti ilə zərərli proqramları dərhal aşkarlayacaq!

Android sizin icazəniz olmadan məlumat toplayan zərərli proqramları dərhal aşkarlaya biləcək. Qeyd edək ki, Google Play Protect-in canlı təhlükənin aşkarlanması funksiyası əvvəlcə Pixel 6 və daha yeni modellər üçün əlçatan olacaq.

May ayında keçirilən I/O tədbirində Google istifadəçiləri şübhəli proqramlardan qorumaq üçün cihazda olan süni intellekt modellərindən istifadə edən yeni Play Protect funksiyasını təqdim etmişdi. Google Pixel seriyası ilə Live Threat Detection xüsusiyyəti təklif edilməyə başlanılıb. Yeni funksiya zərərli proqramları müəyyən etmək üçün tətbiqlərin həssas icazələrlə yanaşı digər proqramlar və xidmətlərlə necə qarşılıqlı əlaqədə olduğunu təhlil edəcək. Şübhəli davranış aşkar etdikdə, canlı təhlükənin aşkarlanması istifadəçiləri dərhal xəbərdar edəcək və onları cihazlarını qorumaq üçün dərhal tədbirlər görməyə çağıracaq.

Xüsusiyyət təhlükəli proqram aşkar etdikdə, istifadəçilərə proqramı cihazlarından silməkdə kömək etmək üçün Play Protect-ə keçidlə bildiriş göndərəcək. Google bildirir ki, bu xüsusiyyət özlərini gizlətməyə çalışan zərərli proqramları aşkarlaya bilir. Canlı təhlükənin aşkarlanması istifadəçinin icazəsi olmadan şəxsi məlumatları toplayan proqramlara diqqət yetirəcək. Google yeni xüsusiyyət ilə birlikdə istifadəçi məlumatlarının toplanmayacağına və məxfiliyin qorunacağına zəmanət verir. Nəticə etibarı ilə deyə bilərik ki, artıq Android istifadəçiləri canlı təhlükələrdn qoruna biləcək.