Google Android 13 Go versiyasını təqdim edib!

Google ilk Android Go versiyasını 5 il əvvəl istifadəçilərə təqdim etmişdi. Ötən gün Google smartfonlar üçün daha yüngül yəni, yeniləməsi daha az yaddaş tələb edən Android 13 Go versiyasını rəsmi olaraq təqdim edib. Google yeni versiyası ilə giriş səviyyəli cihazlar üçün rahat istifadə vəd edir. Bu gün 250 milyondan çox cihazın Android Go versiyasından istifadə etməsi, şirkətin öz məqsədinə çatdığının sübutudur. Şirkət Go versiyasında 3 əsas meyarı birləşdirib. Belə ki, bu meyarlara etibarlılıq, istifadəyə yararlılıq və fərdiləşdirmə aiddir.

Android 13 Go versiyasının xüsusiyyətləri

Bu günlərdə telefonlarda proqram təminatının yenilənməsi o qədər çox yaddaş sahəsi tələb edir ki, giriş səviyyəli cihazların əksəriyyəti proqram təminatını yeniləyə bilmir. Google Go versiyasını məhz giriş səviyyəli cihazlar üçün təqdim edib. Go versiyası ilə giriş səviyyəli cihazlar əsas Android versiyasından kənar təhlükəsizlik yeniləmələrini və lazımi proqram yeniləmələrini uzun müddət ala biləcəklər. Bundan əlavə, Android 13 Go versiyası ilə Google, giriş səviyyəli cihazların daha funksional istifadəsini təmin etmək üçün Explore funksiyasını bu versiyaya inteqrasiya edib.

Bundan başqa, fərdiləşdirmə sahəsində də yeniliklər edilib. Android 13 Go ilə Material You dizayn konsepsiyası əməliyyat sisteminə əlavə edilir. Beləliklə, telefonun bütün rəng sxemi divar kağızı ilə uyğunlaşdırıla bilər. Nəhayət, yeni Go versiyası həmçinin bildiriş icazələri və tətbiq dili seçimləri kimi bəzi vacib yenilikləri də gətirir. Google yeni versiya ilə buraxılacaq ilk smartfonların 2023-cü ildə satışa çıxarılacağını açıqlayıb.