Tesla şirkətinin baş icraçı direktoru Elon Musk, şirkətin 1 Martda keçiriləcək növbəti İnvestorlar Günündə böyük bir açıqlama verəcəyini söylədi. Şirkətin Master Plan 3 adlandırdığı layihə tədbirdə təqdim olunacaq. Belə ki, ehtimallara görə indiyə qədər çıxarılacaq ən ucuz Tesla ilə bağlı bəzi detallar ictimaiyyətlə paylaşıla bilər.
Ən ucuz Tesla, şirkətə Koreya və Çin istehsalçılarının daha ucuz elektrmobillərinə rəqib olmaq üçün nəzərdə tutulacaq. Musk öz sosial media platforması Twitter üzərində tədbir haqqında bunları qeyd edir: Master Plan 3, Yer üçün tam dayanıqlı enerji gələcəyinə aparan yol martın 1-də təqdim olunacaq.
Tesla şirkətinin baş icraçı direktoru Elon Musk həmçinin, bugün də tədbir ilə yeni bir paylaşım edib: 1 Mart Tesla İnvestor Gününü gözləyirik. Bununla biz Yer kürəsinin insanlarında və həyatında olduğu kimi investorun ən geniş tərifini nəzərdə tuturuq. Bu, gələcək üçün yaxşı ümid və pozitivlik mesajı olacaq.
Elon Musk uzunmüddətli strategiyaları Master Plan olaraq adlandırır. 2016-cı ildə elan edilmiş Master Plan 2 mahiyyət olaraq istehsalı və satışı əhəmiyyətli dərəcədə artıracaq ən sərfəli avtomobil olan Model 3 sedanının buraxılması idi. Musk son konfrans zəngi zamanı bildirib ki, Tesla Cybertruck və Semi mühəndisliyi başa çatıb. Onlar indi Model 3 və Model Y elektromobillərinin dəyərinin yarısı qiymətə başa gələn platforma ilə yeni nəsil model üzərində işləyirlər. Yeni Tesla təxminən 4,4 metr uzunluğunda hetçbek kimi gözlənilir. Üç il əvvəl brendin Çin ofisi kiçildilmiş Model Y bənzəri bir eskiz dərc etmişdi. Lakin qeyd edək ki, elektromobilin təkcə Çində deyil, digər bazarlarda da satışa çıxarılması gözlənilir. Ən ucuz Tesla təxminən 25.000 dollar qiymətinə satılacaq.
