Huawei AITO M5 elektromobili təqdim edildi!
Huawei şirkəti AITO M5 hibrid modelinin tamamilə elektromobilə çevrildiyi yeni AITO M5 modelini ötən gün satışa çıxarıb.
Mündəricat (2)
AITO brendinin adı "Adding Intelligence to Auto" sözlərinin birləşməsindən gəlir. Bir neçə il əvvəl Seres şirkəti ilə birlikdə təsis edilən brend son 2 ildə Huawei şirkəti tərəfindən adətən, mənimsənilərək Huawei şirkətinə məxsus elektromobil markasına çevrilib. Qəribə bir fakt var ki, Seres şirkətinin rəhbərlərindən biri keçmiş Tesla həmtəsisçisi Martin İberhard olmuşdur. Huawei şirkəti hal-hazırda AITO brendi altında M5 və M7 adlı hibrid avtomobillər təqdim edir. AITO M5 EV isə həmin M5 hibridinin tam elektromobilə çevrildiyi variantıdır. Çox uzatmadan AITO M5 elektromobilinin sahib olduğu imkanlara və qiymətinə nəzər salaq.
AITO M5 EV üçün saatlar ərzində 30.000-dən çox sifariş verilib
AITO M5 EV modeli eksteryer cəhətdən idman üslublu, orta ölçülü, bəzilərinə görə "Porsche Macan" modelini xatırladan dizayn əldə edib. Hibrid M5 modeli müqayisədə ən əsas fərqi ön tərəfdə radiator barmaqlıqlarının olmamasıdır. Digər bir xırda fərqlilik isə öndə mühərrik olmadığından 80L həcmli su keçirməyən baqaj yerinin quraşdırılmasıdır. Yerdə qalan bütün gövdə elementləri hibrid variantı ilə birə-bir eynidir. İnteryerində isə Huawei şirkətinin hər şeyi gözə mükəmməl xitab edəcək şəkildə hazırladığını söyləməyə ehtiyac yoxdur.
Mərkəzə yüksək keyfiyyətli, nəhəng ölçülü HarmonyOS 3.0 ilə işləyən multimedia və idarəetmə ekranı quraşdırılıb. HarmonyOS 3.0 inteqrasiyası ilə kompüterinizdən tutmuş smartfonunuza qədər müxtəlif cihazlarınızın ekran görüntüsünü belə həmin ekrana ötürə bilərsiniz. Ekranın aşağı hissəsində isə 40 Vt naqilsiz şarj və əlavə olaraq 3 ədəd 66 Vt naqilli şarj yuvaları mövcuddur.
Tam alüminium gövdəyə və müstəqil asmaya sahib AITO M5 EV modelinin ön və arxa ağırlığı 50/50 nisbətindədir. Huawei mühəndisləri həm idarəni, həm stabilliyi, həm təhlüksizliyi artırmaq üçün ağırlıq nisbətini mükəmməl bölməyi bacarıblar. M5 EV modeli təxmin etdiyiniz kimi HUAWEI DriveONE platforması üzərinə qurulub və iki fərqli modifikasiyada təqdim edilir. Hər iki modifikasiya 80 kVts batareyaya sahibdir, lakin elektrik mühərriklərində fərqlilik mövcuddur.
Belə ki, tam ötürməli ən üst variantı 675 nm fırlanma anı, 365 kVt güc hasil edir. 0-100 Km/s sürətlənməsi 4.5 saniyədir və 552 Km yürüyüş məsafəsinə sahibdir. Arxadan ötürməli variantı isə daha zəif performans göstərərək daha çox məsafə gedə bilir. Belə ki, 0-100 Km/s sürətlənməsi 7.1 saniyədir və 620 Km yürüyüş məsafəsi təklif edir. Elektromobilin təkərlərə güc ötürməsi isə Huawei Dynamic Adaptive Torque System ilə ani olaraq yolun tələblərinə görə nizamlanır. 0,266Cd. müqavimət əmsalı ilə Mercedes-Benz EQC (0.29Cd.), BMW iX3 (0.29Cd.) kimi modellərlə müqayisədə daha yaxşı aerodinamik imkanlara malikdir.
Elektromobilin qiyməti
Ötən gün saatlar ərzində 30.000-dən çox sifariş edilən elektromobilin başlanğıc qiyməti 41.585 dollar təşkil edəcək. Ən üst variantını isə çox yüksək olmayan fərqlə 46.100 dollara əldə etmək mümkündür.
