Apple iOS 27 əməliyyat sisteminin stabil versiyasını istifadəyə verib. Səkkiz beta və RC versiyasından sonra yeniləmə iPhone 11 və daha yeni modellər üçün yayımlanıb. iOS 27-nin əsas yeniliyi tamamilə yenilənmiş Siri olsa da, sistem foto redaktəsi, Safari, valideyn nəzarəti, performans və Apple Intelligence funksiyalarında da böyük dəyişikliklər gətirir.
Yeni Siri əvvəlki versiyadan fərqli olaraq generativ süni intellekt modellərindən istifadə edir və istifadəçi ilə daha təbii dialoq qura bilir. Siri Mail, Mesajlar, Qeydlər, Xatırlatmalar və Təqvim kimi tətbiqlərdə məlumat axtara, internetdən istifadə edərək sualları cavablandıra və ekranda göstərilən məzmunu anlayaraq onunla bağlı tapşırıqları yerinə yetirə bilir. Məsələn, elektron məktub hazırlamaq, təqvimə tədbir əlavə etmək və ya fotolarla işləmək mümkündür.
Apple ayrıca Siri tətbiqini də istifadəyə verib. Burada əvvəlki söhbətlərə baxmaq və dialoqu davam etdirmək mümkündür. Siri həmçinin Dynamic Island-a inteqrasiya olunub və yeni “Axtar və ya soruş” interfeysi vasitəsilə mətnlə də idarə edilə bilir. İstifadəçilər Siri-yə foto və fayllar da göndərə bilirlər.
iOS 27 ilə Siri Kamera tətbiqinə də daxil edilib. İstifadəçi ətrafındakı obyektin fotosunu çəkərək Siri-dən onun haqqında məlumat ala bilər. Sistem yeməyin qida dəyərini müəyyənləşdirmək, vizit kartından kontakt yaratmaq, kartı Wallet-ə əlavə etmək, hesabı insanlar arasında bölmək və fotodakı məlumatlar əsasında Təqvimə tədbirlər əlavə etmək kimi əməliyyatları da yerinə yetirə bilir.
Foto tətbiqində süni intellekt imkanları genişləndirilib. “Clean Up” fotolardan arzuolunmaz obyektləri silməkdə daha yaxşı nəticə verir. “Extend” təsvirin sərhədlərini süni intellektlə genişləndirir, “Spatial Reframe” isə fotonun perspektivini və kompozisiyasını dəyişməyə imkan verir. iCloud Shared Albums artıq tam təsvir ölçüsündə paylaşımı dəstəkləyir, Android və Windows istifadəçiləri də paylaşılan albomlara foto əlavə edə bilirlər.
Image Playground da yenilənib. Sistem daha realistik üslublarda təsvirlər yarada, mövcud fotoları mətn əmrləri əsasında dəyişdirə və müxtəlif ölçülərdə sosial şəbəkə şəkilləri, divar kağızları və kontakt posterləri hazırlaya bilir. Genmoji-nin sürəti və yaradılan görüntülərin keyfiyyəti də artırılıb.
Safari-də süni intellekt tabları, əlfəcinləri və Reading List məzmununu mövzular üzrə avtomatik qruplaşdıra bilir. “Notify Me” funksiyası isə istifadəçinin seçdiyi internet səhifələrində qiymət, məhsulun stok vəziyyəti və digər dəyişiklikləri izləyərək yenilik baş verdikdə xəbər verir.
Shortcuts tətbiqində də mühüm dəyişiklik edilib. Artıq istifadəçinin hazır avtomatlaşdırma əmrləri axtarmasına ehtiyac qalmır. Nə etmək istədiyini adi dillə yazmaq kifayətdir və sistem uyğun qısayolu özü yaradır. Təqvim və Xatırlatmalar da tədbir və tapşırıqların təbii dil vasitəsilə yaradılmasını və dəyişdirilməsini dəstəkləyir.
iOS 27 ilə Apple Home tətbiqinin imkanlarını da genişləndirib. HomeKit Secure Video süni intellekt vasitəsilə kamera görüntülərində baş verənləri təsvir edə və müəyyən hadisələr əsasında videolar arasında axtarış apara bilir. Dəstəklənən təhlükəsizlik kameralarında 4K video yayımı və qeyd imkanları da əlavə olunub.
AirPods istifadəçiləri üçün fərdi ekvalayzer təqdim edilib. İstifadəçilər aşağı, orta və yüksək tezlikləri öz zövqlərinə uyğun tənzimləyə bilirlər. Health tətbiqində isə Cycle Tracking funksiyasına perimenopauza və menopauza dəstəyi əlavə olunub. Saat tətbiqində alarm və taymer səslərinin səviyyəsini sistemin ümumi səsindən ayrıca tənzimləmək mümkündür.
Apple Liquid Glass dizaynını da təkmilləşdirib. İstifadəçilər interfeysin şəffaflıq səviyyəsini ayrıca slayder vasitəsilə dəyişə bilirlər. Şirkət mətnlərin oxunaqlılığını artırıb, ikonları daha detallı edib və menyu, düymə və naviqasiya elementlərinin vizual olaraq bir-birindən daha yaxşı ayrılmasını təmin edib.
iOS 27-də performansa xüsusi diqqət ayrılıb. Apple-ın məlumatına görə, tətbiqlər və klaviatura daha sürətli açılır, AirDrop vasitəsilə fayl ötürülməsi sürətlənir, əsas ekran və App Library daha çevik işləyir. Foto tətbiqində yeni çəkilmiş görüntülərin 70 faizə qədər daha sürətli yükləndiyi bildirilir. Wi-Fi ilə mobil şəbəkə arasında keçid də təkmilləşdirilib.
Valideyn nəzarəti imkanları da genişləndirilib. Yenilənmiş Screen Time vasitəsilə valideynlər uşaqların istifadə etdiyi tətbiqləri və daxil olduğu saytları görə, müxtəlif tətbiq kateqoriyaları üçün gün və saata uyğun istifadə limitləri müəyyən edə bilirlər. Uşağın yeni tətbiq yükləməsi, yeni sayta daxil olması və ya yeni şəxslə əlaqə yaratması üçün valideyn icazəsi tələb etmək mümkündür. Communication Safety isə çılpaq görüntülərlə yanaşı, qan və zorakılıq əks etdirən materialları da avtomatik bulanıqlaşdıra bilir.
iOS 27-ni dəstəkləyən iPhone modelləri:
- iPhone SE (2-ci nəsil və daha yeni)
- iPhone 11
- iPhone 11 Pro
- iPhone 11 Pro Max
- iPhone 12 mini
- iPhone 12
- iPhone 12 Pro
- iPhone 12 Pro Max
- iPhone 13 mini
- iPhone 13
- iPhone 13 Pro
- iPhone 13 Pro Max
- iPhone 14
- iPhone 14 Plus
- iPhone 14 Pro
- iPhone 14 Pro Max
- iPhone 15
- iPhone 15 Plus
- iPhone 15 Pro
- iPhone 15 Pro Max
- iPhone 16e
- iPhone 16
- iPhone 16 Plus
- iPhone 16 Pro
- iPhone 16 Pro Max
- iPhone 17e
- iPhone 17
- iPhone Air
- iPhone 17 Pro
- iPhone 17 Pro Max
Yeniləməni “Ayarlar → Ümumi → Proqram təminatı yeniləməsi” bölməsindən yükləmək mümkündür. Yeniləmə uyğun cihazda dərhal görünmürsə, bunun ilk saatlarda Apple serverlərində yaranan sıxlıqla əlaqəli olması mümkündür.
