İlon Maskın Texas ştatında inşa etdirdiyi Advanced Technology Chip Fab (ATCF) layihəsində tikinti işləri gözləniləndən daha sürətlə davam edir. Mart ayında elan edilən layihənin ərazisindən yayımlanan yeni dron görüntüləri göstərir ki, qısa müddətdə zavodun əsas konturları formalaşıb və təməl işlərində ciddi irəliləyiş əldə olunub.
ATCF Tesla və SpaceX-in birgə həyata keçirdiyi yarımkeçirici istehsalı layihəsidir. Zavodun əsas məqsədi məntiq çipləri, yaddaş modulları və qabaqcıl çip paketləmə texnologiyalarını eyni istehsal kompleksində birləşdirməkdir. Bu yanaşmanın şirkətlərə yeni süni intellekt çiplərini daha sürətli hazırlamaq və istehsal etmək imkanı verəcəyi gözlənilir.
Tikintinin son vəziyyətini əks etdirən görüntülərdə təməl konstruksiyalarının sürətlə irəlilədiyi, eyni zamanda podratçılar və müvəqqəti ofislər üçün yeni obyektlərin inşasına icazələrin alındığı görünür. Bu isə layihənin planlaşdırılan qrafikdən daha sürətlə icra olunduğunu göstərir.
ATCF-də hazırlanacaq süni intellekt sürətləndiricilərinin gələcəkdə Tesla elektromobillərində, Robotaxi xidmətində, Optimus humanoid robotlarında və SpaceX-in kosmos əsaslı məlumat emalı layihələrində istifadə olunması planlaşdırılır. Layihə İlon Maskın uzunmüddətli süni intellekt və yarımkeçirici strategiyasının ilk praktik mərhələsi hesab olunur.
Qeyd olunur ki, ATCF tez-tez adı çəkilən Terafab layihəsi ilə eyni deyil. Terafab Texasda daha böyük miqyaslı, şaquli inteqrasiya olunmuş yarımkeçirici istehsal kompleksi olacaq və illik 1 teravat süni intellekt hesablama gücü yaratmağı hədəfləyir. Hazırda həmin layihə hələ ilkin tikinti mərhələsindədir, ATCF isə artıq real tikinti işlərinin aparıldığı ilk obyekt kimi ön plana çıxır.
