Google fəaliyyətini dayandıran ABŞ-nin aşağıbüdcəli hava yolu şirkəti Spirit Airlines-ın korporativ məlumat arxivini 10 milyon dollara satın alır. Əldə ediləcək məlumatlardan Google-un süni intellekt modellərinin və məhsullarının hazırlanması və təkmilləşdirilməsi üçün istifadə olunacaq.
Spirit Airlines-ın müflisləşmə prosesi çərçivəsində satışa çıxarılan məlumat bazası kifayət qədər genişdir. Razılaşmaya əsasən, şirkət əməkdaşlarının e-poçtları, Microsoft Teams yazışmaları, elektron cədvəlləri və təqvim məlumatları Google-a veriləcək.
Bununla yanaşı, Spirit Airlines-ın marketinq, məhsuldarlıq və əməliyyat prosesləri ilə əlaqəli məlumatları da razılaşmaya daxildir. Şirkətin müştərilərlə bağlı əməliyyatlarından əldə edilən rezervasiya və loyallıq proqramı məlumatları, eləcə də tranzaksiya qeydlərinin də məlumat bazasının bir hissəsi olduğu bildirilir.
Arxivdə əməkdaşlarla əlaqəli insan resursları məlumatları da mövcuddur. Bununla belə, açıqlamaya görə, əməkdaş və müştərilərin şəxsiyyətini müəyyənləşdirməyə imkan verən məlumatlar Google-a təqdim edilməzdən əvvəl bazadan çıxarılacaq.
Google sözçüsü şirkətin Spirit Airlines-a məxsus korporativ məlumat bazasının bir hissəsini satın aldığını təsdiqləyib. Bildirilib ki, bu məlumatlar Google-un məhsullarının və süni intellekt modellərinin inkişafına töhfə verə bilər.
Aviaşirkətlər son illərdə süni intellektdən xüsusilə aviabiletlərin qiymətlərinin müəyyənləşdirilməsi, uçuşların planlaşdırılması və əməliyyatların optimallaşdırılması kimi sahələrdə daha geniş istifadə etməyə başlayıblar. Bu baxımdan Spirit Airlines-ın illər ərzində topladığı real əməliyyat məlumatları süni intellekt sistemlərinin hazırlanması üçün dəyərli məlumat mənbəyi hesab olunur.
Spirit Airlines yüksək borc yükü və artan yanacaq xərclərinin yaratdığı maliyyə təzyiqlərindən sonra may ayında bütün əməliyyatlarını dayandırıb. Şirkət bundan sonra müflisləşmə prosesi çərçivəsində sahib olduğu aktivləri satmağa başlayıb. Korporativ məlumat arxivinin Google-a satılması da bu prosesin bir hissəsidir.
