OpenAI, süni intellekt çip istehsalçısı Nvidia ilə strateji tərəfdaşlıq çərçivəsində ümumi gücü 10 giqavat olan nəhəng süni intellekt məlumat mərkəzləri quracağını açıqlayıb. OpenAI-nin baş direktoru Sam Altman bəyan edib ki, bu layihələrin enerji istehlakı bütün Nyu-York şəhərinin istehlakına bərabər olacaq.
Nvidia-nın bu nəhəng layihəyə 100 milyard dollara qədər sərmayə qoymağı planlaşdırdığı bildirilir. Bu məlumat mərkəzləri təkcə enerji istehlakı baxımından deyil, həm də ətraf mühitə təsiri baxımından əhəmiyyətli mübahisələr yaradır. Stargate üçün nəzərdə tutulan layihələr istifadəyə verildikdə, mövcud layihələrə əlavə olaraq, ümumi enerji tələbatı 17 giqavata çatacaq ki, bu da keçən ilki dağıdıcı istilik dalğası zamanı San Dieqonun istifadə etdiyi enerjiyə bərabərdir. Kornell Universitetinin enerji sistemləri mühəndisliyi professoru Fengqi You bildirib ki, “10 gigavat İsveçrə və ya Portuqaliyanın pik enerji tələbatından çoxdur. 17 gigavat iki ölkəni birlikdə enerji ilə təmin etməyə bərabərdir.”
OpenAI və texnologiya nəhəngi Oracle hazırda Texasda yarım milyon evi enerji ilə təmin edə bilən nəhəng Stargate məlumat mərkəzini idarə edir. Planlaşdırılan beş əlavə layihə 500 milyard dollarlıq Stargate-in bir hissəsi kimi cəmi 7 giqavat enerjidən istifadə edəcək. Mütəxəssislər süni intellekt və ümumilikdə hesablama sektoru üçün enerji istehlakının demək olar ki, ağlasığmaz artımını qeyd edirlər. Hesabatlar göstərir ki, 2030-cu ilə qədər hesablamalar dünya enerjisinin 10-12 faizini istehlak edə bilər. BloombergNEF, ABŞ-ın məlumat mərkəzinin enerji tələbatının 2035-ci ilə qədər iki dəfədən çox artacağını və 2024-cü ildəki təxminən 35 giqavatdan 78 gigavata yüksələcəyini proqnozlaşdırır. Texnologiya nəhəngləri karbon emissiyası hədəflərinə çatmaqdan uzaq olduqlarını etiraf edirlər, eyni zamanda AI məlumat mərkəzlərinin də avadanlıqları soyutmaq üçün yerli su resurslarına əhəmiyyətli təzyiq göstərdikləri bildirilir.
