Apple-ın bu ilin sentyabrında təqdim edəcəyi gözlənilən iPhone 18 Pro və iPhone 18 Pro Max modellərinin qiymətində ciddi artım ola bilər. Tanınmış analitik Jeff Pu bildirib ki, yeni Pro modelləri əvvəlki nəsillə müqayisədə 250-300 dollar baha satıla bilər. Bloomberg-in jurnalisti Mark Qurman isə qiymət artımının 100-200 dollar arasında olacağını proqnozlaşdırır. Bu iddialar təsdiqlənərsə, iPhone 18 Pro seriyası Apple tarixinin ən bahalı klassik smartfonları olacaq.
Hazırda iPhone Pro modellərinin başlanğıc qiyməti 1099, Pro Max modellərinin isə 1199 dollardır. Analitiklərin proqnozlarına əsasən, yeni qiymətlər iPhone 18 Pro-nun başlanğıc qiymətini təxminən 1300 dollara, Pro Max modelini isə 1400-1500 dollar səviyyəsinə yüksəldə bilər.
Məlumata görə, qiymət artımının əsas səbəblərindən biri Apple-ın A20 Pro prosessorunda istifadə edəcəyi 2 nanometrlik istehsal texnologiyasıdır. Yeni çiplərin daha yüksək performans və enerji səmərəliliyi təqdim edəcəyi gözlənilsə də, onların istehsal xərclərinin əvvəlki nəsillə müqayisədə 20 faizdən çox artacağı bildirilir. Bununla yanaşı, süni intellekt infrastrukturuna artan tələbat səbəbindən DRAM və NAND yaddaş çiplərinin qiymətində də ciddi yüksəliş müşahidə olunur.
Qiymət artımı yalnız Pro modelləri ilə məhdudlaşmaya bilər. Apple-ın ilk qatlana bilən smartfonunun da bu ilin sentyabrında təqdim ediləcəyi gözlənilir. Bir çox mənbəyə görə, “iPhone Ultra” adlandırılması ehtimal olunan bu modelin başlanğıc qiyməti 2000 dolları keçəcək, bəzi proqnozlarda isə 2300-2500 dollar arasında olacağı bildirilir. Bu isə onu Apple tarixinin ən bahalı iPhone modeli edəcək.
Hazırkı məlumatlara əsasən, Apple iPhone 18 Pro, iPhone 18 Pro Max və qatlana bilən iPhone Ultra modelini ənənəvi sentyabr təqdimatında nümayiş etdirəcək. Daha münasib qiymətli iPhone 18, iPhone 18e və yeni nəsil iPhone Air modellərinin isə 2027-ci ilin yaz aylarına təxirə salınacağı bildirilir. Bununla belə, Apple qiymətlər və yeni modellərlə bağlı hələlik rəsmi açıqlama verməyib.
